అనాదిగా గెలవాలని, నా నమ్మకం
పునాది చేసి ప్రయత్నిస్తూనే ఉన్నా
సనాతన ధర్మం చెప్పిన విధానలతో
ఆధునిక విజ్ఞాన శాస్త్ర నియమాలతో
నా జీవన కాలం కొద్దిగా పెరుగుతుంది గాని
నేనెంత పెనుగులాడిన పీనుగవడం సత్యమని
నేనెంతవాడను నీ ముందని తెలిసిన, శాశ్వతమని
మిధ్యలో నిరంతరం బ్రతికేస్తూనే వున్నా
నిన్ను చూసిన నాడు నాకెంత బలమున్నా
నాకెంత ధనమున్నా, నా పదవేదైనా
నా మతమేదైనా, నా కులమేదైనా
నా వెంట ఎందరున్నా నే ఒంటరినే
--శివ భరద్వాజ్
భాగ్యనగరం
తరుణమిపుడు మేల్కొనగ - తరుణమిపుడు అడుగేయగ
తరుణమిపుడు మేల్కొనంగ
తరుణమిపుడు అడుగేయంగ
తరుణమిపుడు ఎంచుకొనగ
తరుణమిపుడు మేల్కొనంగ
మతము గొప్పదా ధర్మము గొప్పదా
కులము గొప్పదా కూరిమి గొప్పదా
నిజము గొప్పదా సత్యము గొప్పదా
బలము గొప్పదా ధైర్యము గొప్పదా
తేల్చుకొన సమయమొచ్చెను
మతము మారవచ్చు గాని ధర్మము నిత్యము
కులము మారవచ్చు గాని కూరిమి నిత్యము
నిజము మారవచ్చు గాని సత్యము నిత్యము
బలము మారవచ్చు గాని ధైర్యము నిత్యము
-- శివ భరద్వాజ్
భాగ్యనగరం
కాలాన్ని గౌరవించడం నేర్చుకో
ముదురుతుంది వయస్సుని కాలం కరుగుతుందని--శివ భరద్వాజ్
భాగ్యనగరం.
కన్ను కన్ను కలసిన వేళ
నన్ను నిన్ను కలపిన వేళ
చేయి చేయి తాకిన వేళ
పదం పదం కలసిన వేళ
వేయి వేణువులు మోగిన వేళ
రాగ మాలికలు పాడిన వేళ
కాలి అందియలు ఘల్లున మోగే
చేతి కంకణములు ఝల్లున మోగే
కోటి తారకాలు భువి చేరిన వేళ
పున్నమి చందురుడు పుడమి చేరిన వేళ
అధరం మధురం అయ్యిన వేళ
మన ప్రణయం పరిణయ మయ్యిన వేళ
ఒకరికొకరం అయ్యాం
ఒకే కుటుంబమయ్యాం
--శివ భరద్వాజ్
భాగ్యనగరం
బాల్యంలో తీయటి నీటి ఊటలా
మొదలై కౌమారంలో సెలయేటిలా
ఉరకలెత్తి అందరినీ మురిపించి
యవ్వనంలో ఉప్పొంగు ఉత్సాహ జలపాతమై
ఉరకలెత్తి ఉధృత నదిలా మారి
జీవిత అనుభవాలచే నడివయసున
మందగమనమై తన చుట్టూ ఉన్న అవనిని
సస్యశ్యామలం చేసి సుజలాన్ని పంచి
అందరి దాహర్తి తీర్చి సుందర డెల్టాలను
సృష్టించి, జీవితాలను సమృద్ధి చేసి
వృద్ధ దశలో తనను ప్రక్కనపెట్టినారని
కన్నీటి ఉప్పదనం నిండ ఎంత గొప్ప నదియైన
మృత్యు సముద్రంలో కలువక తప్పదు
తన ఉనికిని కోల్పోక తప్పదు
--శివ భరద్వాజ్
భాగ్యనగరం
అందంగా కనపడుతుందని అడుగేయబోతే
అగాధ పాతాళానికి జారిపోతావు
మధురంగా ఉందని మరింత లాగిస్తే
మధురానికి దూరం అవుతావు
చేదెక్కువని కాకర పక్కన పెడితే
ఆనక డాక్టరు గొట్టాలు చేసి పోస్తాడు
మత్తు గమ్మత్తుగ ఉందని అనుభవిస్తుంటే
కిక్కు వస్తుందేమోకాని మధురమైన జీవితం మరుగై పోతుంది
తొక్కితే సర్రున పోతుందని కారు నడిపితే
సాఫీగా సాగాల్సిన జీవితాలు తెర మరుగైపోతాయి.
--శివ భరద్వాజ్
భాగ్యనగరం
అమ్మ కష్టము నాకు ఏమి తెలుసు
నను లాలించి పెంచి పెద్దచేసిన
అమ్మను ఏమి తెలియని బేలగా చూసిన
నాకు ఏమి తెలుసు ఆమె పడిన కష్టము
తన వెచ్చటి గుండెలకు హత్తుకొని నా చలిని పోగొట్టింది
తన నాలుకతో నా కంటిన నలుసును తీసివేసింది
తను మెత్తగ నెత్తిన తట్టి దగ్గును పోగొట్టింది
ఎక్కిల్లు వస్తే మంచినీటినిచ్చి నిలువరించింది
నే పక్క తడిపితే ఓపికతో మార్చింది
నా మాసిన బట్టలు ప్రేమగా ఉతికింది
నేను ఏడుస్తున్నది పాలకోసమా , బొమ్మ కోసమా
నలత వలనో, కలత వలనో కనిపెట్టి
పాలను పట్టి, బొమ్మను చూపెట్టి,
మందు వేసి కనిపెట్టి, గుండెలకు అదిమి పెట్టి
నా భయము పోగొట్టినట్టి అమ్మను
నిరంతరం తన కంటిపాపలా లాలించినట్టి అమ్మను
ఏమి తెలియని బేలగా చూసిన
నాకు ఏమి తెలుసు ఆమె పడిన కష్టము
మహిళా దినోత్సవ శుభాకాంక్షలతో
--శివ భరద్వాజ్
భాగ్యనగరం
--శివ భరద్వాజ్
భాగ్యనగరం
పుడమి తల్లి ఆక్రోశం
పుడమి తల్లి ఆక్రోశం ఎవ్వరు విందురు
అడవి అంతా గనులగా మార్చునదెవ్వరు
ఎడారిగ మారుటకు పచ్చటి అడవుల ఎదురుచూపులొకవైపు అవని
తడారి పగిలిన పంట పొలాలు ఒకవైపు
జడివానల భీతావహం ఇంకొకవైపు
కడగండ్లు పెట్టించు వడగండ్లు ఒకవైపు ఎవరి స్వార్ధం ఫలితమిది
నడిరేయిన కూడా వేడి గాలి వీస్తుంటే
సడిచేయక ఏ‌సిల మాటున నిదురిస్తుంటే
నడి సంద్రమున మృత్యుఘోష హోరెత్తుతుంటే కనికరించునదెవరు
సుడులు తిరిగి పెను తుఫాను విరుచుకుపడుతుంటే
మడమ తిప్పక సంద్రముప్పెనై మీద పడుతుంటే
వడిగా ఎవరు వచ్చి రక్షించి దయ చూప వలె? అమ్మ ధరణి గాక
మనిషి ఆశకు అంతులేదు
మనమున్న అవనిని పట్టించుకోక
కనరాని అంగారక ఆవాసం ఆలోచిస్తున్నాం!
తను కూర్చున్న కొమ్మనరికి సాధించేది ఏమిటి?
వార్ధక షట్పద:
ధర్మాన్ని చెప్పు తాతయ్య దండగపేర
మర్మం తెలియక ఊరిలోనే ఉంచాము
నిర్మలమగు నీతి కథలు చెప్పు తాతమ్మను చేర్చితి వృద్ధాశ్రమున
ఖర్మ నీతి శాస్త్ర పిరియడ్ తీసివేస్తిమి
కమ్మగ చిన, పెద బాల శిక్ష లకు శిక్షలు
సమ్మగా వేసి, స్మగ్లర్స్ ను, రౌడీ, డాన్ లను హీరోలు చేస్తిమి మరి
నీతిగ బ్రతుకు వాడికి లౌక్యం తెలియదని
నీతి మాలి పక్కన పెట్టినా, బ్రతికుంది
నీతి ప్రతివాడిలో "నేతి" బీరకాయన నేతి వలె, అవకాశముకు
నాత్రపడి రానంత వరకు శ్రీరాములే,
నీతి మంతులే, అవకాశము దొరికిన ఏ
మాత్రంబు మారకుండు వాడే అచ్చమైన సీతారాముడగు మరి
--శివ భరద్వాజ్
భాగ్యనగరం
తపించు - ఆచరించు - సాధించు
రావాలనుకుంటే రానిదేదీ లేదు
కావాలనుకుంటే కానిదేదీ లేదు
చేయాలనుకుంటే చేయలేనిది లేదు
దక్కాలనుకుంటే దక్కలేనిది లేదు
అనుకో
బలంగా అనుకో
కోరుకో
బలంగా కోరుకో
తపించు
ప్రతిక్షణం తపించు
ఆచరించు
అనుక్షణం ఆచరించు
అపుడు నువ్వు పొంద లేనిదేదీ ఉండదు
అపుడు నువ్వు సాధించ లేనిదేదీ ఉండదు
--శివ భరద్వాజ్
భాగ్యనగరం
విజయవంతమైన జీవితం కావాలంటే
విజయ జీవితం కావాలంటే
త్యాగబుద్ధి ఇక రావలోయ్
బద్దకాన్ని నీ వదలలోయ్
వేకువఝామున లేవలోయ్
ధ్యానము నీవు చేయాలోయ్
విజయ జీవితం కావాలంటే
యోగము నీవు చేయాలోయ్
ప్రాణాయామం సాగాలోయ్
బుద్ధిని నీవు పెంచాలోయ్
కండను కలిగి ఉండాలోయ్
విజయ జీవితం కావాలంటే
కలలను పెద్దగ కనలోయ్
నీ లక్ష్యం రూఢి కావలోయ్
నిరతం మెరుగులు అద్దలోయ్
సతతం ప్రగతిని చూపాలోయ్
విజయ జీవితం కావాలంటే
లక్ష్యం దిశగా సాగాలోయ్
శ్రద్ధను నీవు నిలపాలోయ్
ఓర్పుతో ముందుకు సాగాలోయ్
లక్ష్యం ముంగిట నిలవలోయ్
-- శివ భరద్వాజ్
భాగ్యనగరం
