శ్రీ రామ జయ రామ జయజయ రామ:
🔱 అంతర్యామి 🔱
# మౌన దీక్ష ...
🍁సాధనలో భాగంగా కొందరు మౌనం పాటిస్తారు. ఇది అనేక మతాల్లో ఉన్న అభ్యాసమే. నిశ్శబ్దమే దైవమని, దైవమే నిశ్శబ్దమనీ అంటారు స్వామి రామా. దైవాన్వేషణ- అంత తేలికైన విషయం కాదు. మౌనం స్వరూప స్వభావాన్ని పూర్తిగా ఆకళింపు జేసుకుని, అభ్యసించేందుకు ప్రయత్నించాలి.
🍁కళ్లు మూసుకుని మౌనంగా కూర్చుంటే సాధన అనిపించుకోదు. సాధనలో ఉన్నవారు మౌనంగా ఉండటంతోబాటు ఉపవాసం, బ్రహ్మచర్యం, నిద్రను అధిగమించడం చేస్తారు. పాటించే పద్ధతులన్నీ ఆధ్యాత్మికంగా ఒకదానికొకటి సాయపడతాయి. మాట్లాడకుండా ఉండటం మొదటిరకం. తరువాతది మరింత కష్టమైంది. కళ్లు, చేతుల సైగలు, ముఖ కవళికలు రాతల ద్వారా తెలియపరచటం... ఏదీ చేయకూడదు. అసలైన మౌనదీక్ష ఒక పద్ధతిలో సాగి క్రమక్రమంగా మనసులోని అంతర్గత సంభాషణని తగ్గిస్తుంది.
🍁మనసంటే ఒక శక్తి. అందులో జ్ఞానేంద్రియాల ద్వారా అలవాట్లు, భావోద్వేగాలకు అనుగుణంగా ఆలోచ తరంగాలు ఉత్పత్తి అవుతాయి. అవి మనసును ఉక్కిరి బిక్కిరి చేస్తూ, అంతర్గత రొదకు కారణమై మాటలు, చర్యల రూపంలో బయటపడేలా చేస్తాయి. ఏ మాత్రం శిక్షణ లేని మనసు తక్కువ శక్తి వ్యాప్తికే కంపిస్తుంది. సాధన మనసుకు శిక్షణను ఇవ్వడానికే. సాధకుడు క్రమం తప్పకుండా పాటించే మౌనం, ధ్యానం, అంచెలంచెలుగా లోతుల్లోకి చేరుకున్నాక ప్రశాంత స్థితిని చేరుకుంటాడు. సంకల్పం తీసుకున్నాక మౌనదీక్ష వల్ల అవగాహన, సమదృష్టి పెరిగి ఆధ్యాత్మిక సాధన వేగవంతం అవుతుంది.
🍁 సంక్లిష్ట పరిస్థితుల్లో సైతం ప్రశాంతంగా, స్థిమితంగా ఉండటం సాధ్యమవుతుంది. అవసరానుగుణంగా మనసు లోతుల్లోంచి మాట్లాడటం అలవాటు అవుతుంది. మాట మీద పట్టు వచ్చాక హితం-మితం-ప్రియం అనే మూడు సూత్రాలను అనుసరించాలి. అంటే, వీలైనంత తక్కువగా మంచిగా మాట్లాడాలి.
🍁నిశ్శబ్దం దైవభాష, అందులోంచే అన్నిభాషలూ పుట్టుకొచ్చాయనిపిస్తుంది. వ్రతం అంటే వాగ్దానం. మౌనవ్రతం ఆత్మశక్తికి దోహదపడుతుంది. ఆచితూచి మాట్లాడతారు. ఎదుటివారి మనసులను నొప్పించే ప్రమాదం ఉండదు. మానవజన్మకు ఒక సార్ధకత ఏర్పడాలంటే ముందు మనిషి శబ్దంలోంచి నిశ్శబ్దంలోకి ప్రవేశించాలంటారు. మౌనాన్ని పాటించడమంటే నిశ్శబ్దాన్ని సంపూర్ణంగా ఆస్వాదించటం. అది తీసుకొచ్చే శాంతిని అనుభూతి చెందటం. ఆ నిశ్శబ్దంలోని ఆనందానికి పారవశ్యం చెందటం. మర్మజ్ఞులు కొండలు, అడవుల బాట పట్టడానికి కారణం నిశ్శబ్దంలో, ఆనంద స్థితిలో జీవిత పరమార్థం అన్వేషించటానికే.
🍁వాస్తవాన్ని ఎరుకపరచటానికి మాటలు అవసరంలేదని భావించారు రమణమహర్షి. నిశ్శబ్దంగా ఉండాలని బలవంతంగా ప్రయత్నిస్తే ఫలితం ఉండదు. ఆ పరిస్థితిని కల్పించుకోవాలి. సారవంతమైన నేలలో విత్తనం నాటి నిరీక్షించటమే.🙏
✍️- మంత్రవాది మహేశ్వర్
⚜️⚜️🌷🌷🌷⚜️⚜️⚜️
శ్రీ రామ జయ రామ జయజయ రామ
🌹🌹🌹🌹🌹🌹🌹🌹🌹🌹🌹
ఈ బ్లాగు వివిధ సందర్భాల్లో నా స్పందనకు అక్షర రూపం. జీవితంలో నేను తెలుసుకున్న సత్యాలకు ప్రతిరూపం.
7, ఫిబ్రవరి 2025, శుక్రవారం
🔱 అంతర్యామి 🔱
27, జనవరి 2025, సోమవారం
తేటగీతి: అప్పు చేయకు ఆడంబరాల కొఱకు
అప్పు చేయకు, ఆడంబరాల కొఱకు,
తప్పు చేయకు, సంబరాల కొఱకు, మరి
వినక చేసిన ముప్పువాటిల్లు, పట్టు
నీకు జీవితకాలంబు తేరుకొనగ!
-శివ భరద్వాజ్
Meaning: Don't borrow for the sake of show, don't make mistakes for the sake of temporary enjoyment, happiness and celebration, and If we do so, we will throw our life into problems, some times we can not overcome that problems in our life time.
25, జనవరి 2025, శనివారం
🔱 అంతర్యామి 🔱
శ్రీ రామ జయ రామ జయజయ రామ:
🔱 అంతర్యామి 🔱
# బుద్ధి సూక్ష్మత...
🍁సబ్బునీటితో బుడగ సృష్టించి సంబరపడటం చిన్నతనం. మనిషి జీవితం నీటి బుడగన్నది గ్రహించడం పెద్దరికం. ఆటబొమ్మగా చిన్నకారును చూసి సంబరపడే పిల్లాడికి, కారు కొనుక్కుని దాన్ని వివిధ భంగిమల్లో చూసి మురిసిపోయే పెద్దవారికి తేడా ఏమీ లేనట్టే! అవసరార్థం వనరులు సమకూర్చుకోవడం వేరు, ఆడంబర ప్రదర్శనకు వస్తువులను ఏర్పాటు చేసుకోవడం వేరు. మనసు కన్నా బుద్ధి శక్తిమంతమైనది అంటోంది గీత. బుద్ధి పదునవుతున్నకొద్దీ మనసు దానంతటది నియంత్రితమవుతుంది. వయసుతో పాటు బుద్ధి వికసించాలి. ఆలోచనల్లోని పరిణతి ఆచరణలో కనిపించాలి. వ్యక్తిత్వవికాసం అంటే అది!
🍁జ్ఞానం మూడు స్థితులలో పనిచేస్తుంది. మొదటిది అంతః ప్రేరణ తెలివి, రెండోది సహజ జ్ఞానం (ఇదే బుద్ధి)- బాహ్య ఉపకరణాల ద్వారా నేర్చుకోవడం, పరిసరాలూ-పరిస్థితుల నుంచి గ్రహించడం వల్ల కాకుండా సహజసిద్ధంగా హృదయ లోతుల నుంచి ఉద్భవిస్తుంది. ఇదే వాస్తవమైంది. దీన్నే శాస్త్రాల్లో బుద్ధి, ధీః, హృదయకమలం, జ్ఞాననేత్రం అంటారు ఈ సహజ జ్ఞానం ఉద్దీపనం అవడమే బుద్ధియోగం అన్నది గీతాప్రవచనం. పవిత్ర హృదయంతో, ప్రార్థనలతో, గాయత్రి వంటి మంత్రజపాలతో బుద్ధిసూక్ష్మత పొందడం మూడోది. బుద్ధి పరిధిని పెంచుకుంటూ, మనసు ప్రమేయాన్ని నామమాత్రం చేసుకుని ఆత్మజ్ఞానం పొందడం మానవజన్మ లక్ష్యం. జాగృతి చెందిన బుద్ధిని సారథిగా చేసుకొన్న వ్యక్తి భగవంతుడి సాన్నిధ్యాన్ని తేలిగ్గా చేరతాడు.
🍁మందబుద్ధి సారథ్యంలోని వ్యక్తి గమనం లౌకికతతో కొట్టుమిట్టాడుతూ అగమ్యగోచరమవుతుంది అన్నది. కఠోపనిషత్తు వాక్యం. కర్తవ్యసాధనలో తలమునకలయ్యే సాధకుడు వ్యక్తులతో, వస్తువులతో సంబంధాలు పెంచుకోడు. వివిధ దశల్లోని భవబంధాలను, వస్తువుల పట్ల ఆపేక్షను ఎప్పటికప్పుడు తేలిగ్గా వదిలించుకుంటూ కడపటి గమ్యం చేరతాడు. చెట్టు నుంచి పచ్చని ఆకును, దోర కాయను, విరబూసిన పువ్వును విడదీయడానికి బలం కావాలి. కానీ పండిన ఆకు, కాయ, పరిపూర్ణంగా వికసించి ఎండిన పువ్వు సులువుగా నేలరాలి మట్టిలో కలిసిపోతాయి. ఒక్కోదానికి ఒక్కో చివరి దశ ఉంటుంది. అక్కడికి చేరుకున్నాక అనీ విడిపించుకుని మనసును, శరీరాన్ని తేలిక చేసుకోవాలి.
🍁గొంగళిపురుగు తన చుట్టూ తానే గూడు అల్లుకుని, దాంట్లో బందీ అవుతుంది. అందులోనే ఉండి అది ఎంత రోదించినా దానికి సాయం చేయడానికి ఎవరూ రారు. చివరికి అదే జ్ఞానం పొంది, అందమైన సీతాకోకచిలుకలా బయటికి వస్తుంది.
🍁ప్రాపంచిక బంధాలకు సంబంధించి మనిషి పరిస్థితీ ఇదే. వ్యామోహాలను ఛేదించుకుని మోక్షం సాధించాలి. ఉన్నతమైన జీవితం గడపాలంటే శరీరాన్ని, ఇంద్రియాలను తదనుగుణంగా మలచుకోవాలి. మనసు కోరికలకు ఆజ్యం పోస్తుంది.
🍁కృత్రిమ వస్తువులపట్ల మొదట ఆకర్షితమై, తర్వాత్తర్వాత దాసోహమై చివరికీ అదే జీవితమన్న భ్రమకు లోనవుతుంది. ఆ మాయలోంచి బయట పడగలిగిన మానవ జన్మే ధన్యమవుతుంది.🙏
✍️-ప్రతాప వెంకట సుబ్బారాయుడు
⚜️⚜️🌷🌷🌷⚜️⚜️⚜️
శ్రీ రామ జయ రామ జయజయ రామ
🌹🌹🌹🌹🌹🌹🌹🌹🌹🌹🌹
19, జనవరి 2025, ఆదివారం
డబ్బు ఉంటే సుఖమే, ఇది నిజమే!
డబ్బు ఉంటే సుఖమే, ఇది నిజమే!
డబ్బు చేసిన మనిషి,
జబ్బు చేసిన మనిషి ఒకటే, ఇదీ నిజమే!
పడవ పయనం సాగాలంటే,
నీటి అవసరం నిజమే!
పడవలోకి నీరు పయనిస్తే,
పడవ పయనం ముగుస్తుంది, ఇదీ నిజమే!
-శివ భరద్వాజ్
16, జనవరి 2025, గురువారం
🔱 అంతర్యామి 🔱
శ్రీ రామ జయ రామ జయజయ రామ:
🔱 అంతర్యామి 🔱
# భక్తి పారవశ్యాo...
🍁దైవభక్తి, మాతృభక్తి, పితృభక్తి, గురుభక్తి... భక్తికి రూపాలు. ఏ భక్తి అయినా పూర్తి విశ్వాసంతో స్థిరంగా ఉండాలి. భగవంతుడు పూజలకు, జపతపాలకు, అభిషేకాలకు పొంగిపోననీ, నిష్కల్మషమైన భక్తికి లొంగిపోతాననీ అనేక సందర్భాల్లో చెప్పాడు. భక్తులకు కామ, క్రోధ, లోభ, మోహ, మద, మాత్సర్యాలు ఉండకూడదని శాస్త్రాలు చెబుతున్నాయి. ఆంజనేయుడు, ప్రహ్లాదుడు, మార్కండేయుడు, ధృవుడు, నారదుడు, అంబరీషుడు మొదలైన వారు అచంచలమైన భక్తికి మారు రూపాలు.
🍁భగవంతుడి మాయ ఆయనకి తప్ప వేరెవ్వరికీ అర్థం కాదు. ఆయన భక్తులకు చిన్న, చిన్న పరీక్షలు పెడుతుంటాడు. వాటికి తట్టుకుని నిలబడటం సంపూర్ణ భక్తి ప్రపత్తులు కలవారికి మాత్రమే సాధ్యం. అచంచల, నిష్కల్మష, నిస్వార్థ భక్తికి అర్ధం చెప్పే అద్భుతమైన సంఘటన ఒకటి భాగవతంలో ఉంటుంది. ఒకసారి కృష్ణ పరమాత్మకి భరించలేని తలనొప్పి వచ్చింది. ఎవరికీ చెప్పకుండా మౌనంగా బాధని భరిస్తున్నాడు. ఆయన భార్యలకు విషయ తెలిసి ఎన్నో ఉపచారాలు చేశారు. కానీ ఫలితం శూన్యం. పరమాత్ముడి బాధను చూసి వారంతా తల్లడిల్లిపోయారు. రాజ వైద్యులను పిలిపించారు. వాళ్లూ అనేక రకాల చికిత్సలు చేశారు.
🍁కృష్ణపరమాత్మ బాధ మాత్రం తగ్గలేదు. నారద మహర్షి, పలువురు మునులు, దేవతలు వచ్చారు. వారూ ఏమీ చేయలేకపోయారు. సృష్టి, స్థితి, లయ కర్త అయిన పరమాత్ముడికి వచ్చిన బాధని ఎవరు తగ్గించగలరు? నివారణోపాయం ఆయనకి తప్ప ఎవరికి తెలుసు? శ్రీకృష్ణ పరమాత్మ భార్యలు, ఆ బాధ తగ్గే విధానం చెప్పమని ఆయననే ప్రార్థించారు. తన భక్తులు ఎవరైనా వారి పాదధూళిని తన శిరస్సుపైన ఉంచితే, తలనొప్పి తగ్గుతుందని చెప్పాడాయన. ఆ మాటకి చుట్టూ ఉన్నవారంతా నిర్ఘాంతపోయారు. తమ పాదధూళి భగవంతుని శిరస్సుపై ఉంచడమా? ఎంత పాపం!? రౌరవాది నరకాలలో పడిపోతాం... అనుకున్నారు. అందరూ ముక్తకంఠంతో అటువంటి మహా పాపానికి పాల్పడలేమన్నారు. మీ ఇష్టం అన్నట్టుగా శ్రీకృష్ణపరమాత్మ తల పట్టుకుని బాధపడసాగాడు.
🍁తమ ప్రియసఖుడు బాధ పడుతున్నాడనే వార్త గోపికలకి తెలిసింది. పరుగున వచ్చారు. ఆయన బాధను చూసి కన్నీరుమున్నీరయ్యారు. వారికి అక్కడున్న వారు విషయం చెప్పారు. కానీ భగవంతుని శిరస్సుపై పాదధూళి ఉంచడం మహా పాపమని హెచ్చరించారు. దానికి గోపికలు తమను కోట్ల జన్మలవరకు పాపాలు వేధించినా పరవాలేదనీ, స్వామి బాధ తగ్గితే చాలనీ, తమ పాదధూళిని శ్రీకృష్ణ పరమాత్మ తలపై ఉంచారు. అది గోపికల భక్తి పారవశ్యానికి పరాకాష్ఠ. క్షణంలో ఆయన నొప్పి మటుమాయమయ్యింది. ఆయన బాధ కేవలం మాయ అని, భక్తులని పరీక్షించడానికి ఆడిన నాటకమని అందరికీ తెలిసింది. గోపికలు సంతోషంతో పొంగిపోగా మిగిలినవారంతా తలదించుకున్నారు.🙏
✍️-ఎం.వి.ఎస్.ఎస్. ప్రసాద్
⚜️⚜️🌷🌷🌷⚜️⚜️⚜️
శ్రీ రామ జయ రామ జయజయ రామ
🌹🌹🌹🌹🌹🌹🌹🌹🌹🌹🌹
10, జనవరి 2025, శుక్రవారం
🔱 అంతర్యామి 🔱
శ్రీ రామ జయ రామ జయజయ రామ:
🔱 అంతర్యామి 🔱
# సమయం రావాలి!...
🍁ఒకసారి ఓ సాధువు శిష్యులతో ఓ గ్రామంలో బస చేసి అక్కడి ప్రజల సమస్యలను తెలుసుకుంటూ, పరిష్కార మార్గాలను సూచిస్తున్నాడు. అది తెలిసి పొరుగూరి రామయ్య, భీమయ్య ఆయన దగ్గరకు వచ్చారు. తమ గోడు విన్నవించుకున్నారు.
'మమ్మల్ని దరిద్రం పట్టిపీడిస్తోంది. మాకు నిధి నిక్షేపాలక్కరలేదు. మనులు మాన్యాలక్కరలేదు. కడుపునిండా తిండి దొరికే మార్గం చూపండి
స్వామీ!' అని వేడుకున్నారు. సాధువు సంచిలోంచి ఒక పొట్లం తీసి, దాంట్లోంచి రెండు విత్తనాలు ఇద్దరికీ ఇచ్చాడు. 'వీటిని తీసుకెళ్లి నాటండి. మొక పెరిగి మధురఫలాలను ఇస్తుంది. వాటి రుచి అమోఘం. మంచి ధర పలుకుతుంది. మీకు ఆస్తులు గడించి పెట్టకపోయినా, ఆకలిబాధ లేకుండా ఆదుకుంటుంది' అన్నాడు. వాళ్లు సంతోషించారు.
🍁తిరిగెళ్లాక నేల చదును చేసి విత్తనం నాటి నీళ్లు చల్లారు. నాటిన దగ్గర్నుంచీ రామయ్య గింజ ఎప్పుడు మొలుస్తుందా అని ఎదురు చూసేవాడు. వారమైంది, పదిరోజులైంది. మొలక రాలేదు. తవ్వి చూస్తే విత్తనం అలాగే కనిపించింది. ఇంకేం మొలకెత్తుతుందని కోపంగా తీసి పారేశాడు. మరో వారం తరవాత భీమయ్య పాతిన గింజ మొలిచి చకచకా ఎదిగి కాపు పట్టింది. మధురమైన ఆ పండ్లను అమ్మి సొమ్ము చేసుకుంటున్న భీమయ్యను చూసి తాను ఆ అవకాశాన్ని కోల్పోయినందుకు రామయ్య బాధపడ్డాడు. గుడ్డు నుంచి కోడిపిల్ల రావటానికి 21 రోజులు పడుతుంది. గర్భంలోని శిశువు భూమ్మీద పడటానికి తొమ్మిది నెలలు పడుతుంది. ఏ పనులు నెరవేరాలన్నా కొంత సమయం పడుతుందన్న ఇంగితజ్ఞానం లేకపోతే ఫలితం అనుభవించక తప్పదు.
🍁ఒక్కోసారి మనం పడిన కష్టానికి తగిన గుర్తింపు వెంటనే లభించదు. అలాంటప్పుడు కుంగిపోవడం, నిగ్రహం కోల్పోవడం తగదు. బాణభట్టారకుడనే మహాకవి పద్దెనిమిదేళ్లకే 'కాదంబరి' అనే గ్రంథం రాసి, రాజాశ్రయానికెళ్లాడు. అక్కడున్న పండితులు ఇతణ్ని హేళన చేశారు. 'కాదంబరి' అంటే కల్లు. కల్లు తాగితే రుచి తెలియదని రాజు భావించి పరిపక్వత లేదు, పొమ్మన్నాడు. బాధపడిన బాణుడు ఇంటికెళ్లి కోపంతో కావ్యాన్ని తగలెట్టాడు.
రెండురోజుల తరువాత కాళిదాసు వెళ్లి 'అబ్బాయ్, నీ కాదంబరిని మరోసారి వినిపించు' అంటే బాణుడు. తెల్లముఖం వేసి విషయం చెప్పాడు. 'సరేలే, నేను చెప్తా రాసుకో' అని ఏకసంధాగ్రాహి అయిన కాళిదాసు తాను విన్న కాదంబరిని ఉన్నదున్నట్లుగా అప్పజెప్పాడు. లేకపోతే కాదంబరి మనకు దక్కేది కాదంటూ బహుళ ప్రచారంలో ఉన్న కథ తొందరపాటు చర్యలు ఎంత నష్టం కలిగిస్తాయో చెబుతుంది.
🍁మరికొందరుంటారు... పర్యవసానం గురించి ఆలోచించకుండా తోచిన పని చేసేస్తారు. అవివాహిత అయిన కుంతి దుర్వాసుడిచ్చిన వరాన్ని ముందుచూపు లేకుండా ఆచరణలో పెట్టబట్టే కదా అంత కడుపుకోత అనుభవించింది. ఏ పనికైనా ముందు వెనకలు ఆలోచించి, సమయాసమయాలు చూసి నిర్ణయాలు తీసుకోవాలి.
✍️- పి. వి. బి. శ్రీరామమూర్తి
⚜️⚜️🌷🌷🌷⚜️⚜️⚜️
శ్రీ రామ జయ రామ జయజయ రామ
🌹🌹🌹🌹🌹🌹🌹🌹🌹🌹🌹
28, డిసెంబర్ 2024, శనివారం
సావడి కబుర్లు -2
సావడి కబుర్లు -2
వందేమాతరం
ఈమధ్య ఇతరత్రా కార్యక్రమాల వల్ల సాయంత్రం వ్యాహ్యాళికి, అదేనండి నేడు మనం మాట్లాడుకునే ఈవినింగ్ వాక్ వెళ్లడం కుదరలేదు. మొన్న ఆదివారం బజార్లో శ్రీకృష్ణభగవాన్లు గారు కలిసి అవీ ఇవీ మాట్లాడుతూ నువ్వు అమ్మ పక్షపాతివయ్యా అన్నారు. అదేంటండి అంత మాట అనేసారు అంటే, ఆరోజు అమ్మ గురించి బాగానే చెప్పావు మరి నాన్నని మర్చిపోయావేం అన్నారు.
అమ్మంటే ప్రొద్దున్న లేచినప్పటి నుంచి రాత్రి పడుకునే వరకు మనం చేసే అన్ని పనుల్లోనూ కనిపిస్తూ ఉంటుంది కాబట్టి వెంటనే చెప్పగలిగాను. మరి నాన్న అలా కాదు కదా, సంసార సాగరంలో ఎన్నో విస్ఫోటనాలు తనలో దాచుకుని పైకి పున్నమి రోజు చంద్రోదయంలో అందరిని మైమరపించే సముద్రపు అలలలా కనిపిస్తాడు. అమ్మ చూసేది ఆకలి, నాన్న చూసేది అభివృద్ధి, నేర్పేది పాలన. మార్గం అమ్మ చూపిస్తే, మార్గనిర్దేశం నాన్న ఆలోచిస్తాడు. వర్తమానాన్ని అమ్మని నడిపిస్తుంటే, మన భవిష్యత్తుని మనకంటే ముందు నాన్న ఆలోచిస్తాడు. దానికై రేయింబగళ్లు శ్రమిస్తూ మన నడకకి బంగారు బాట నిర్మించే కృషీవలుడు నాన్న. నాన్న మన బలానికి క్రమశిక్షణకి మూల స్తంభం వంటివాడు. అమ్మతో గడిపిన అంత సమయం నాన్నతో గడిపే అదృష్టం ప్రపంచంలో ఎవరికో గాని దొరకదు. అందుకే తల్లితో ఉన్నంత చనువు తండ్రి దగ్గర ఉండదు. తండ్రి నిస్వార్ధంగా నిరంతరం కుటుంబం గురించి రగిలే ఒక జ్వాల. ఆ బాధ్యత అనే వేడి పిల్లలకు తెలియకూడదని వారు భరించలేరని దానిని తనలోనే రగులుచుకుంటూ చాలా సందర్భాల్లో తండ్రి ఒంటరితనం అనే యాత్ర సాగిస్తుంటాడు. విచిత్రం ఏమిటంటే మన అవసరాలకు పోపులుడబ్బాలో దాచిన డబ్బులు ఇచ్చిన అమ్మని దేవతలా చూస్తాం కానీ తన కష్టాలని ఆ డబ్బులుగా మార్చిన నాన్నను గుర్తించం. అమ్మది భూదేవంత ఓర్పు సహనం అనే చెప్పకుంటాం కానీ ఆకాశమంత నాన్న ఔనిత్యాన్ని గుర్తించం. మనల్ని నవమాసాలు మోసిన అమ్మని జీవితాంతం గుర్తు పెట్టుకుంటాం కానీ మనతో పాటు అమ్మను కూడా మోసే నాన్న గొప్పతనాన్ని గుర్తించలేకపోతున్నాం. చిన్నప్పుడు మనల్ని దండించిన నాన్న గుర్తుంటాడు, గానీ దానికి కారణమైన మన తప్పును దిద్ది క్రమశిక్షణ నేర్పించిన తండ్రి మార్గదర్శకత్వాన్ని మర్చిపోతాం. ఆ కోపం వెనక నాన్న మనసులోని చల్లదనం గుర్తించం. నాన్న కూడా అంతే ఎప్పుడూ తన గుర్తింపు కోరుకోడు. గుర్తింపు తెచ్చుకున్న పిల్లలను చూసి గర్వించడం తప్ప. ప్రపంచానికి మనని పరిచయం చేసేది అమ్మ అయితే ప్రపంచాన్ని మనకు పరిచయం చేసేది నాన్న.
అమ్మంటే బోళా, నాన్నేమో కాఠిన్యం అనుకుంటారు అందరూ, కానీ ఆ కోపం వెనుక నాన్నకు ప్రేమ లేక కాదు మన విజయానికై ఉన్న ఆరాటం అలా కనిపిస్తుందని గుర్తించాలి. మనం గెలిస్తే అభినందిస్తాడు ఓడిపోతే ధైర్యం చెబుతాడు అదే నాన్నంటే.
అభిజ్ఞాన శాకుంతలంలో
‘అంగాదంగాత్ సంభవతి పుత్రః
హృదయాదభిజాయతి ఆత్మావై పుత్ర నామాసి అంటారు, అంటే పుత్రుడు తండ్రి శరీర కణాల నుంచే కాదు, హృదయ అనుభూతితో జన్మించేవాడు అని. ఆ అదృష్టాన్ని పుత్రులు నిలుపుకోవాలి కానీ, దురదృష్టం ఏమిటంటే చిన్నప్పుడు నాన్న భుజాల మీద స్వారీ చేస్తాం, కానీ పెద్దయ్యాక ఆ రెక్కల భారాన్ని పంచుకునే ప్రయత్నం కూడా చేయం. ఒకవేళ అరా-కొర చేయి వేసినా ఆ భారాన్ని మొత్తం తామే మోసినట్లు చెమటలు ఓడ్చే పిల్లలను చూస్తున్నాం. పైగా వారి ఢాంబికాలు, అతిశయోక్తులు ప్రచారం చేసుకునేందుకు ఈ మధ్య సాంఘిక మాధ్యమాలు కూడా తోడయ్యాయి. అటువంటి పిల్లలను తండ్రులు క్షమించాలి. అయినా క్షమ తండ్రులకు కొత్త కాదులే, వారు ఎన్ని క్షమిస్తే, ఎన్ని భరిస్తే ఈరోజు ఈ స్థితిలో ఉన్నమో పిల్లలు గుర్తించాలి.
మనము ఒక విషయం గుర్తుపెట్టుకోవాలి. ఏంటంటే మన అభివృద్ధే నాన్న జ్ఞాపకం, మన భవిష్యత్తే నాన్న వ్యాపకం. మన ఆలోచనలే నాన్న జీవితం. ఒక కవిగారు అంటారు నాన్న తన భుజాల మీద మనని ఎందుకు కూర్చోబెట్టుకుంటాడో తెలుసా, తన పిల్లలు తనకంటే ఎత్తు నుండి ప్రపంచాన్ని చూడాలని. నాన్న చూపించిన దారిలో మనం అనుకున్న విజయాలు సాధించవచ్చు సాధించకపోవచ్చు, కానీ అపజయం మాత్రం ఉండదు. పిల్లల గెలుపులో తన ఓటమిని ఆనందించేవాడు తండ్రి ఒక్కడే. నాన్న అమ్మని ఎందుకు గౌరవిస్తాడో తెలుసా? అమ్మ గౌరవం పిల్లలకు సురక్షితం కాబట్టి.
చివరిగా అమ్మది ప్రేమ, నాన్నది దీవెన.
యస్మాత్పార్దివ దేహః ప్రాదుర
భూద్యేన భగవతా గురుణా
ఎవరివల్ల ఈ భౌతిక శరీరం జన్మించిందో అలాంటి భగవత్ స్వరూపుడు, సర్వజ్ఞమూర్తి అయిన తండ్రికి వేలాది నమస్కారాలు'
ఉంటా
మృశి
దశిక ప్రభాకర శాస్త్రి
23.12.2024
21, నవంబర్ 2024, గురువారం
మనం దేనితో కలుస్తామో.. దానిగా మారిపోతున్నాం
💝 ఓం పూర్ణమిదః పూర్ణమదం
పూర్ణాత్ పూర్ణముదచ్యతే|
పూర్ణస్య పూర్ణ మాదాయా పూర్ణమేవావశిష్యతే||
ఓం శాంతి శాంతి శాంతిః
💖 ~భగవంతుడు పూర్ణుడు.
పూర్ణానికి పూర్ణం కలిపినా, పూర్ణంలోంచి పూర్ణం తీసేసినా మిగిలేది పూర్ణమే.
❤️ ~ఇదే శ్రుతి వాక్యం. ఈ వాక్యాన్ని సరిగా అర్థం చేసుకుంటే... జీవితమంతా ఇందులోనే ఉంది. మోక్ష మార్గం ఇందులోనే దాగి ఉంది. సమస్త సాధనాల సారం ఇందులోనే ఉంది.
💕 0 + 0 = 0
💕 0 ౼ 0 = 0
💞 కానీ...
💓 0+1 = ఎంత అంటే.....మనం వెంటనే 1 అని సమాధానమిస్తాం.
❤️ ఇక్కడ సున్నా ...ఒకటితో కలవగానే 1 గామారిపోయింది.
💓 0+2 =2....
❤️ సున్నా 2 తో కలవగానే సున్న మాయమై రెండుగా మారింది.
💞 అంటే.....సున్నా దేనితో కలిస్తే దానిలా మారిపోతూంది.
💝 గాఢ నిద్రలో మనం పూర్ణమైన భగవంతుడిగా ఉంటాం.
💖 మనకప్పుడు ఏ భావోద్వేగాలు ఉండవు. సున్నలాంటి మనం నిద్రలేవగానే ప్రకృతితో ఎప్పుడైతే కలుస్తున్నామో మనం అప్పటికప్పుడే ప్రకృతే ఐపోతున్నాం.
💓 మనం దేనితో కలుస్తామో.. దానిగా మారిపోతున్నాం.....
♦️ బాగా గమనించాలి.
💕 నీ ఎదురుగా ఒక వ్యక్తి ఉన్నాడు...అతడు గతంలో నీకు ఎంతగానో సహాయం చేసాడు…
ఆ వ్యక్తిని చూడగానే...నీలో అతనిపట్ల ఆత్మీయత కలుగుతుంది. నువ్వూ అతనికి ఎలాగైనా సహాయం చెయ్యాలని ఆలోచిస్తావు.
💕 ఒక వ్యక్తి నిన్ను ఎంతగానో బాధించాడు...అతను కనబడగానే నువ్వు కూడా అతన్ని ఎలాగైనా బాధించాలని ఆలోచిస్తావు.
❤️ ఎదుటి వ్యక్తి ప్రేమతో వస్తే..నీకూ అతనిపట్ల ప్రేమ కలుగుతోంది.
❤️ ఎదుటి వ్యక్తి నిన్ను గౌరవిస్తే నీకూ అతనిపట్ల గౌరవం కలుగుతున్నది. అంటే...
💖 మనం ఎదుటి వ్యక్తిలోని ఏ గుణాన్నాయితే గమనిస్తున్నామో..
మనం మనకు తెలీకుండానే ఆ గుణంతో కలిసిపోయి....ఆ గుణంగానే మారిపోతున్నాం.
💝 మనం దేనితో కలుస్తున్నామో... దానిలా మారిపోతున్నాం.
💓 మనలో సున్నా (0) లా ఉన్న పరమాత్మతత్వం...ఎదుటి వ్యక్తీలోని కోపంతో కలవగానే అది కోపంగా మారి మనకు కోపం వస్తుంది.
❤️ నువ్వు ప్రేమతో కలిస్తే ప్రేమగా, ద్వేషంతో కలిస్తే ద్వేషంగా మారిపోతావ్.
💝 ఎదుటివారిలోని అహంకారాన్ని చూస్తే నీలో కూడా అహంకారం మొలుస్తుంది.
❤️ అందుకే....
💞 ప్రతి జీవిలోనూ, మనిషిలోనూ పరమాత్మ ఉన్నాడని గ్రహించి ఆయనతో అనుసంధానం అవ్వు.
💝 అంటే నీలోని పూర్ణాన్ని ఎదుటి వ్యక్తీలోని పూర్ణంతో కలుపు.
వచ్చేది పూర్ణమే.
💖 ఎదుటి మనిషిని చూడగానే అతనిలోని దోషాలను గుర్తిస్తే మనం అతనిలో దేన్ని ముందుగా చూస్తామో మనం అదిగా మారిపోతామన్న మహా సత్యాన్ని గమనించాలి.
❤️ అందుకే ఎలాంటి వారిలోనైనా భగవంతుణ్ణి చూడగల్గి ఆయనతో కలిస్తే...మనం కూడా భగవత్ తత్వంగా మారిపోతాము.
💕 సదా ఈ సృష్టిలోని ప్రతి వస్తువులోనూ పరమాణు స్వరూపంతో ఉన్న భగవంతునితో అనుసంధానమవుతూ ఉండాలి.
💞 అంటే మంచి చెడు తటస్థ లక్షణాల్లో,అన్ని గుణాలలో, అన్ని ఆలోచనలలో, అన్ని అనుభూతుల్లో, మనోభావాల్లో, అనారోగ్య లక్షణాల్లో, ఆరోగ్య లక్షణాలలో, పూర్ణాన్ని అనుభూతి చెందాలన్నమాట.
💝 ఇక్కడ పూర్ణం లేదా భగవంతుడు అంటే నిరాకారం, వ్యాపకం, నిశ్చలం, నిర్గుణం, సచ్చిదానంద స్వరూపం,తృప్తి, బ్రహ్మానందం, ప్రశాంతత.
ॐ నమో భగవతే వాసుదే వాయ🙏
20, నవంబర్ 2024, బుధవారం
ఏడుచేపల కథ - అంతరార్ధం
ఈ కథ ఎందుకు పుట్టింది.!!
అనగనగా ఒక రాజు,
ఆ రాజుకు ఏడుగురు కొడుకులు..
ఏడుగురు కొడుకులు ఒకనాడు వేటకు వెళ్ళి ఏడు చేపలను వేటాడారు.
ఎన్నో అసహజాలు, అసంగతాలయిన సన్నివేశాలు ఉన్నా, ...
రీజనింగ్ అడగకుండా, ఆలోచించకుండా
వినే గొప్ప తెలుగు కథ
ఈ #ఏడు_చేపల_కథ..
నిజానికి రాజు గారి కొడుకులకు చేపలు వేటాడాల్సిన కర్మ ఏం పట్టింది.
అడవికి పోయి క్రూర మృగాలను వేటాడవచ్చు కదా!
అయినా ఎవ్వరూ
ఈ ప్రశ్న వేయరు.
చెరువుకు పోయి చేపలు తెచ్చారే అనుకుందాం.
వాటిని ఎండబెట్టడానికి, ఎండిన వాటిని ఎత్తి పోసుకోవడానికి వారి దివానుల్లో నౌకర్లే కరువయ్యారా...
నిజానికి ఈ ప్రశ్న
ఎంతో వ్యాలిడ్ ప్రశ్నే..
అయినా ఎవ్వరూ
ఈ కోణం నుంచి ప్రశ్న వేయరు.
అందుకే
ఈ కథను జాగ్రత్తగా గమనిస్తే,
చదువుకుంటే అనేక అంతరార్థాలు,
పైకి కనిపించని విశేషాలు స్ఫురిస్తాయి..
రాజు గారు అంటే మనిషి..
ఆయనకు ఏడుగురు కొడుకులు అంటే మనిషి లోని సప్త ధాతువులు.
కొడుకులు వేటకు వెళ్ళడమూ అంటే..
మనిషి జీవితాన్ని కొనసాగించడం.
జీవితమే ఒక వేట.
వేటే ఒక జీవితం.
రాజకుమారులు వేటాడిన ఏడు చేపలు అంటే ..
మనిషికి ఉండే అరిషడ్ వర్గాలు ( అనగా 6 )
1. కామ
2. క్రోధ
3. లోభ
4. మోహ
5. మద
6. మాత్సర్యాలు
వీటన్నింటిని మనిషి సాధన చేసి ఎండ గట్టవచ్చు..
అంటే పూర్తిగా నియంత్రించవచ్చు.
అందుకే కథలో
ఆరు చేపలను
ఎండ గట్టినట్టు చెప్పారు.
రాజు గారి కొడుకులు ఎండబెట్టిన ఏడు చేపల్లో ఒక చేప ఎండలేదు.
ఏమిటా చేప.?
అది మనస్సు
దీన్ని జయించడం
చాలా కష్టం.
ఎంత ప్రయత్నించినా
అది ఎండదు.
మనస్సు అంటే ఏమిటి..?
మనస్సు అంటే
సంకల్ప వికల్పాలు.
ఒకటి తీరుతుంటే మరొకటి మొలుచు కొస్తుంది.
మొలిచే కోరికలను తీర్చుకుంటూ పోతుంటే జీవిత కాలం చాలదు.
కోరికలన్నింటిని జయించేసి మోక్షానికి వెళ్ళిపోవాలని ప్రతి ఒక్కరూ ఆరాట పడుతుంటారు.
మోక్షానికి వెళ్ళాలనుకోవడం కూడా ఒక కోరికే.
ఆ కోరికను ఎండగడితే తప్ప మోక్షం రాదు.
ఈ చేప ఎండకుండా అడ్డు తగులుతున్నది ఏది..?
గడ్డిమేటు.
గడ్డిమేటు
అంటే ఏమిటి.?
కుప్పపోసిన అజ్ఞానం.
గడ్డిమేటులా పేరుకు పోయిన అజ్ఞానాన్ని తొలగించాలంటే ఎలా.?
మామూలు గడ్డికుప్ప అయితే గడ్డి పరకలను పట్టి లాగీ, పీకి ఒకనాటికి ఖాళీ చేయవచ్చు.
కానీ
అజ్ఞానం అలాంటిది కాదు.
జ్ఞానదాయకమైన మాటలు ఎంత చెప్పినా, ఎన్ని చెప్పినా, ఎన్నిసార్లు చెప్పినా మనం చేత్తో గడ్డి పరకలను లాగినట్టే.
ఆ కుప్ప తరిగేది కాదు., తగ్గేది కాదు.
దాన్ని ఎంత ప్రయత్నించినా తగ్గించడం కష్టం.
మరి
అది పోవాలంటే
ఏం చేయాలి.!!
ఆవు వచ్చి మేయాలి.
ఆవు ఎక్కడనుంచి రావాలి.?
అసలు..
ఆవు అంటే ఏమిటి.?
ఆవు అంటే
#జ్ఞానం.
జ్ఞానం అనే ఆవు
దొడ్లో ఎగబడి మేస్తే..
అజ్ఞానం అనే గడ్డి కుప్ప ఒకనాటికి అంతరించి పోతుంది.
లేదూ…
జ్ఞానాన్ని అగ్నికణంగా మార్చి గడ్డిమేటు మీద వేస్తే కాలి బూడిదవుతుంది.
అందుకే భగవద్గీతలో మన కర్మలు, వాటి ఫలితాలు జ్ఞానాగ్నిలో దగ్ధమైపోవాలని చెబుతాడు కృష్ణుడు.
(జ్ఞానాగ్ని దగ్ధకర్మాణాం)
జ్ఞానాన్ని అగ్నిగా మలుచుకోగలిగిన వాడు సిద్ధ పురుషుడు, యోగ పురుషుడు మాత్రమే.
ఈ గోవును
ఎవరు మేపాలి.?
గొల్లవాడు మేపాలి. గొల్లవాడు అంటే ఎవరు..?
సమర్ధ సద్గురుడు, జగద్గురుడు.
జ్ఞానరూపమైన భగవద్గీతను లోకానికి ప్రసాదించిన కృష్ణుడు గొల్లవాడే కదా..
అర్జునుడు అనే దూడను అడ్డు పెట్టుకుని వేదం అనే ఆవు పాలు పిండి జ్ఞాన రూపంగా మనందరికి ధారపోశాడు.
ఇంత గొప్పపని చేయవలసిన ఈ గొల్లవాడు ఆ పని చేయలేదు.
ఏమిరా నాయనా.. ఆవును ఎందుకు మేపలేదు అని అడిగితే అమ్మ అన్నం పెట్టలేదు అన్నాడు.
ఇంతకీ ఆ గొల్లవాడికి అన్నం పెట్టాల్సిన అమ్మ ఎవరు..?
అమ్మల గన్న అమ్మ ముగ్గురమ్మల మూలపుటమ్మ పెద్దమ్మ.
ఆమెనే లోకం జగన్మాత అని కీర్తిస్తుంది.
ఈ జగన్మాత అన్నం పెట్టక పోవడం వల్ల గొల్లవాడి ఆకలి తీరలేదు.
ఓ జగన్మాతా..
ఈ గొల్లవాడికి ఎందుకు అన్నం పెట్టలేదమ్మా అంటే ఆవిడ పిల్లవాడు ఏడ్చాడు అంది.
ఇంతకి ఆ పిల్లవాడు ఎవరు..?
ఆర్తితో దైవానుగ్రహం కోసం అలమటించేవాడు.
ఈ పిల్లవాడు ఎందుకు ఏడుస్తున్నాడు..?
వాడికి చీమ కుట్టింది.
ఎక్కడిది చీమ.?
దానికి
ఇంకోపేరే సంసారం.
సంసారం అనే చీమ కుట్టినందుకు ఆ పిల్లవాడు ఏడుస్తున్నాడు.
ఆవులను మేపడానికి వచ్చే గొల్లవాడి కన్నా ఆర్తితో దైవానుగ్రహం కోసం ఏడ్చే పిల్లవాడే ముఖ్యం కనుక ఆ పిల్లవాడినే చూసుకుంది.
మరి గొల్లవాడు అమ్మ అన్నం పెట్టక పోవడం వలన తన విధిని నిలిపి వేశాడా..?
లేదు...
అమ్మ ద్వారా తన పనిలో భాగమైన శిష్ట రక్షణను చేసుకున్నాడు.
చీమ కుట్టినందుకు
కథలో పిల్లవాడు ఏడ్చినట్టే..
సంసార బాధలు, ప్రపంచ బాధలు భరించలేక మనం కూడా ఏడుస్తున్నాం.
మనల్ని ఈ బాధలే చీమలై కుడుతున్నాయి.
చీమలు
పుట్టలోనే ఉంటాయి.
ఏమిటీ ఈ పుట్ట.?
మనిషికి ఉండే సంసారం
ఒక పుట్ట.
ఈ పరమార్థాన్ని చెప్పడం కోసమే జీవితంలోకి అడుగు పెట్టే ముందే ఈ గొప్ప విషయం తెలియాలనే సదుద్దేశంతోనే
మన పెద్దలు
మన బాల్యంలోనే..
ఈ కథను ప్రతి పిల్లవాడికి నూరిపోశారు. 🤗
భారతీయ మహిళ ఔన్నత్యం
నిజంగా లోతైన ఆలోచన కలిగించే వ్యాసం👇 🌼 మహిళల తెలివితేటలను అర్థం చేసుకోవడానికి ఎవరైనా ఎప్పుడైనా నిజంగా ప్రయత్నించారా? 🌼 మనం తరచుగా తెలివి...
-
మాటలు చెప్పుటేగాని మరి నిజముగ చేయ రాదు అడిగిన తరుణమున మురియ, ఆదుకొనగ చేత గాదు సాయము చేయు వారి మనసా! నువు వెన్నవా? కాదు మాయెడల దయ చూపు ...
-
డబ్బు జబ్బు చేసిన మనిషికి గౌరవం మబ్బు చాటుకి వెళ్లిన తెలియటం లేదు తెలిసినా పట్టించుకోవడం లేదు నిబ్బు మందుతో జోగుతూ, కులం కైపుతో తూలుతున్నా ...
-
స్పందించేందుకు సమయం లేదు వివరించేందుకు విషయం లేదు వినేటందుకు ఓపిక లేదు తెలుసుకునేంత తీరిక లేదు మన బ్రతుకేదో బ్రతికేస్తున్నాం మన చావేదో చస్త...