18, అక్టోబర్ 2023, బుధవారం

ముసలితనం

ఎంతో గొప్పగా బతికి,
ఎంతో ఎత్తుకు ఎదిగి,
చేవ ఉన్నన్ని రోజులు  
చల్లగా నీడనిచ్చిన నన్ను,
మోడువారగానే అనాధచేసి  
ఎండిన కట్టెగానే చూస్తున్నారు.

పచ్చటి సంపదతో,
కోరికల ఫలాలు అందించినన్ని రోజులు
రోజు వచ్చి తియ్యగా పలకరించేవారు.


ఇప్పుడు రిటైర్ అయ్యి,
పచ్చటి ఆకుల కాసుల గలగలలు ఆగి  
దగ్గరకు వస్తే కోరికల ఫలాలు దొరకవని,
నీళ్లు పోస్తే దండగని, నా నీడన బతికిన వారే!
దూరంనుంచి చూసి వెళ్లిపోతున్నారు.


పలకరించే దిక్కులేక
ఎండిపోయిన కొమ్మల చేతులు దోసిలి పట్టి,
గుక్కెడు నీటి చుక్కలు పొసే వారి కోసం,
పొడిబారి పగిలిన కాళ్ళ వేళ్ళతో
బలహీనంగా నుంచొని రోజులు లెక్క పెడుతున్నా.

ఇది కలి మాయయా!
కాలం మార్చిన మనుషుల పోకడా!!
అర్ధంకాక, కృతజ్ఞత మరిచిన వారిని,
పొడి కళ్ళతో చూస్తూ,
దూరంగా ఎండిన చెట్టు
పక్కన ఇంటిలో పండిన ముసలి,
ఇరువురి ఆలోచన ఒక్కటే.

ఎవరున్నా, లేకున్నా,
నా కట్టెకు, నీ కట్టె తోడుగా,
సహదహనమవుదామన్న
ఇరువురికి  ఓదార్పు ఒక్కటే,

- శివ భరద్వాజ్

17, అక్టోబర్ 2023, మంగళవారం

నాయకుల గ్యారంటీ మాటలకు వారంటీ ఉండదు

 ఓటునడగ వచ్చిన నాయకుల గ్యారంటీ
మాటలకు వారంటీ యుండదు.
ఏమి చేయునో చెప్పే నాయకులు
ఎలా చేయునో అడిగితే మరలరారు.

ఉద్దరింపగ ఉచితంగిచ్చేది
పైపంచెన నూనె పట్టిన తీరుగ నుండు
పంచె క్రిందన టాక్సుల పీపాలు రెడీగ నుండు
లేకుండిన తెచ్చు అప్పుల కుప్పలు,
చేయును ధరల పెంపులు,
కాకుండిన భూములు వేలము వేయు
తవ్వి అమ్ము ఇసుకను, మట్టిని,
పిండి చేయును కొండలు గుట్టలు.

కాలుష్యమున ముంచే పారిశ్రామిక ప్రగతితో
బతుకుకు కాన్సరు బహుమతిగ వచ్చు
అడవుల తరిగించి, కొండలు కరిగించి
ఉచితమైన నీటికి, గాలికి ఖరీదు కడుతూ
మందుల కుంపటి లేని ఇల్లు ఒకటైనా ఉందా?

కావలిసింది గాంధి కలలు కన్న గ్రామ స్వరాజ్యం.
కల్పించాల్సింది పని కల్పన
పెంచాల్సింది తలసరి సంపాదన.
ప్రతి చేయి పని చేయడానికి లేవాలి.
విసిరే ఎంగిలి మెతుకులు దోసిట పట్టేందుకు కాదు.

-శివ భరద్వాజ్

14, అక్టోబర్ 2023, శనివారం

మనస్సు - స్థితి

 ఆటవెలది:
కఠిన స్థితి ఎదుటబడ, బలహీన మనసు
మనిషి, అది సమస్యవలెను చూడు,
సమునకది సవాలు. అవకాశమనిపించు
బలమగు మనసుకల మనషులకది.

భావం: కఠినమైన పరిస్థితులు ఎదురైనపుడు, బలహీనమగు మనస్సు కల వ్యక్తి దానిని సమస్యవలె చూస్తాడు, సమతుల్యమైన మనస్సు కలవాడు దానిని ఛాలెంజ్ లా స్వీకరిస్తాడు. కానీ బలమైనటువంటి మనస్సుగల మనుషులకు కఠినమైన పరిస్థితులు అవకాశాలుగా కనిపిస్తాయి.

-శివ భరద్వాజ్

రాబందులు రెక్కి

నవ్వుతున్న గాంధీ నోటులిచ్చి
నిజాయితీగా ఓటునడుగుతున్న
నాయకుల గెలిపించిన ఓటరు
మహాశయులారా మీకు "వంద"నాలు.

బీరు సారానిచ్చి బేషరతుగ
నీతి తప్పక ఓటు నడుగుతున్న
నాయకుల గెలిపించిన ఓటరు
మహాశయా నీకు మన"సారా" దీవెనలు.

దమ్ము బిరియాని తినిపించి
దయ చూపించమని ఓటునడుగుతున్న
దమ్మున్న నాయకుని గెలిపించిన  ఓటరు
మహాశయా నీ "దమ్ము"కు జేజేలు.

కుక్కలు వేసే ఎంగిలి విస్తరి,
నక్కలు వేసే బొక్కల పులుసుకు,
జలగలు వేసే రక్తపు కూటికి,
రాబందులు వేసే మాంసపు ముక్కకి,
ఆశపడి ఓటు వేశావా! మాపటేలకు
నీ విస్తరి ఉండదు.
ఆకలినలమటించి బొక్కలు తేరిన
నిన్ను పీక్కు తినడానికి నక్కలు నక్కి,
రాబందులు రెక్కి చేస్తూ
సడి చేయక ఉంటాయి.
జలగలు మెత్తగ రత్తము
పీలుస్తుంటాయి

- శివ భరద్వాజ్



- శివ భరద్వాజ్

13, అక్టోబర్ 2023, శుక్రవారం

సంతోషం ప్రాణం ఉన్న నీలో ఉంది.......

 

సంతోషం ప్రాణం ఉన్న నీలో ఉంది.......

ఆనందపు విత్తనాలు జల్లితే
సంతోషాల పూలు విరుస్తాయి.
విచారపు విత్తనాలు జల్లితే
దుఃఖపు మొలకలు మొలుస్తాయి.
కాలపు ఒడిలో సేదతీరుదామంటే
అది ఎప్పుడు తీరిగ్గా కూర్చోదు.
సంతోష సమయాన గడియారం ఆగదు
దుఃఖంలో ఉన్నావని జాలి తలచదు.
సంతోషం ప్రాణం లేని వస్తువులలో లేదు.
సంతోషం ప్రాణం ఉన్న నీలో ఉంది.......

-శివ భరద్వాజ్

12, అక్టోబర్ 2023, గురువారం

నా పిల్ల! నిదుర పిల్ల!!

 
అటు ఇటు దొర్లి దొర్లి
పొర్లు దండాలు పెట్టినా
దయచూపని దేవతలా
కటిక చీకటిన ఎంత వెదికిన
కంటి ఆర్తి తీర్చగ కానరాదు
శ్రమ లేని ఒంటికి
మింటినున్న తారకలా
ఒంటరినై ఉన్న నను వలచి రాదు

రంగుల రంగేళి చరవాణిని వదిలిపెట్టి
సాగే సీరియల్ టి‌వికి బొంద పెట్టి
కళ్ళు మూసి తననే ధ్యానిస్తే వస్తానని
కండిషనులు ఖరాకండిగా చెప్పేసింది.

ఎంత బతిమాలిన రాను పొమ్మంది
పుస్తకాల పూలు జల్లి పడకనేక్కితే
వస్తానంది నా పిల్ల! నిదుర పిల్ల!!

- శివ భారద్వాజ్


10, అక్టోబర్ 2023, మంగళవారం

ఒంటరితనపు ఎడారిలో - జ్ఞాపకాల ఎండమావులతో - విరహపు దాహం తీరదు

 సాయంత్రం ఆరు కాగానే ఎపుడెపుడు
                    ఇంటికి వెళదామని ఎదురుచూచిన నేను
సాయంత్రం ఆరు దాటినా అపుడేనా
                    ఇంటికి వెళ్లడం అని అనుకుంటున్నాను.
కాలింగ్ బెల్ కొట్టకనే చిరునవ్వుతో
                    కాఫీ కప్పుతో ఎదురొచ్చి నిలిచే నువ్వు
కాఫీ కలుపుకుంటున్నపుడు గుర్తొస్తున్నావు.

స్నానానికి సబ్బు అందించే నీ చేతుల
                     మెత్తటి స్పర్శ ఇపుడు తగలడం లేదు.
వేడివేడిగా నీవు వడ్డించే గుత్తి వంకాయ
                     కమ్మదనం నా నాలుకకి తెలియడం లేదు.

అహంకరించి, హుంకరించి మాటల కత్తులతో
                     దాడిచేసి  గాయం చేసిన నాకు,
ఇంటికి వెళ్లిన ప్రతిక్షణం నీ మెమొరీలు గుండెల్లో,  
                     మెత్తటి మేకులై దిగబడుతూనే ఉన్నాయి.

పుష్కలంగా దొరికే మురిపాల బంధాల విలువ
                    చేజారి ఒలికినపుడు మాత్రమే తెలుస్తుంది.
ఒంటరితనపు ఎడారిలో,  నీ జ్ఞాపకాల ఎండమావులతో
                    విరహపు దాహం తీరక నిను వెదుకుతు గడిపేస్తున్నాను.  
ఎన్నటికీ తీరని నీ సాంగత్యపు
                    దాహంతో ఒంటరినై బతికేస్తున్నాను.

- శివ భరద్వాజ్
 
                     

9, అక్టోబర్ 2023, సోమవారం

పిల్లల సందడి


గణ గణ మని గంటలు మోగెను
జనగణమన పిల్లలు పాడెను
త్వర త్వరగా బ్యాగులు సద్దెను
బిల బిల మని బయటకువచ్చెను
గభ గభమని ఇంటికి వచ్చెను
గల గలమని నవ్వులు నవ్వెను
టక టకమని గంతులు వేసెను
అబ్బబ్బయని అమ్మలు అరిచెను
చిటపటమని చినుకులు కురిసెను
టపటపయని డాన్సులు చేసెను
సరసరమని అమ్మలు వచ్చెను
సురసురమని చూపులు రువ్వెను
మెలమెల్లగా పిల్లలు వచ్చెను
యేడియేడిగా బజ్జీలొచ్చెను
కరకరమని అందరు తినెను
అమ్మను పొగుడుతూ పిల్లలు  పండెను
నాన్నలు నవ్వుతూ అమ్మల చూసెను

-శివ భరద్వాజ్

7, అక్టోబర్ 2023, శనివారం

జీవితం వర్ణ మయం - ఎండుటాకులా రాలిపోతావో - ఇంద్ర ధనస్సులా శోభిస్తావో

 

తెల్లని ముఖమున్ననేమి సుఖము
నల్లని మనసున్న నిను మించిన వికారి ఎవడు?
నవనవలాడే వంకాయలా గలగల కాసులున్న గాని,  
బీదల యెడ ఉదారత చూపక పుచ్చువంకాయల మిగలకు,
విచారంతో పీనుగ నీలం పొందిన నీ ముఖం చూసుకో,
ఈర్ష్య ద్వేషాలతో పచ్చటి బతుకుని పాడు చేసుకుంటూ,
పసుపు పచ్చని నీ జీవితాన్ని ఎండిపోనీయకు.
శిశిరపు వేళ పచ్చటి ఆకు కూడా నారింజరంగు పొంది రాలవలిసిందే!
బలవంతుడవని ఇతరుల ఎర్రటి రక్తం కళ్ల చూస్తే,
నీ శిశిరపువేళ పిల్లగాలికే రాలిపడి ముగుస్తుంది నీ జీవితం. 


నల్లని ముఖమున్నంత మాత్రాన విచారమెందుకు?
తెల్లని మనసున్న నిను మించిన సుందరుడెవడు!
పుచ్చులేని వంకాయలా వంకలేని రారాజులా బతుకు,
అంతర్ముఖుడవై నీలోకి నీవు పయనించు, ఉదారత చూపించు,
కారుణ్య నీలపు కాంతులు సర్వ జీవులయెడ ప్రసరించు,
పచ్చటి ప్రకృతితో మమేకమై జీవించు,
పసుపు పచ్చగా అందరి ఇల్లు సంతోషాలతో నిండి పోవాలని,
ఉదయించే నారింజ సూర్యుని శక్తి పొంది, ఉరికే జలపాతమై,
ఎర్రటి గులాబీలా నీ ప్రేమ అందరికీ అందించు.
ఇంద్రధనస్సులా ఉత్సాహం నింపుతూ కలకాలం జీవించు.

-శివ భరద్వాజ్

భారతీయ మహిళ ఔన్నత్యం

 నిజంగా లోతైన ఆలోచన కలిగించే వ్యాసం👇 🌼 మహిళల తెలివితేటలను అర్థం చేసుకోవడానికి ఎవరైనా ఎప్పుడైనా నిజంగా ప్రయత్నించారా? 🌼  మనం తరచుగా తెలివి...