ఎదురు చూస్తున్నా

ఎదురు చూస్తున్నా,
ప్రతి నిముషం నిన్ను తిరిగి పొందాలని,
ఎదురు చూస్తున్నా,
కాలంతో కనుమరుగైన నిన్ను రప్పించాలని,
మన మధ్య ఆ చిలిపి తగాదాలేవి?
మన మధ్య ఆ విరహపు వేదనలేవి?
నీ సమక్షమే ప్రపంచమని తలచాను నాడు!
నీ పరోక్షమే మిన్నని రాజీపడ్డాను నేడు.
నీ మాటల తియ్యదనం చవిచూసాను నాడు!
నీ మాటల కరుకుదనానికి తల్లడిల్లాను నేడు.
నా రాక పండుగలా చేసుకునేవు నాడు!
పులిని చూసిన జింకలా బెదిరేవు నేడు.
అభిప్రాయ బేధాలను పరిష్కరిద్దాం, కాకుంటే పక్కన పెడదాం
నా మాటే గెలవాలన్న పంతాన్ని మాత్రం కాటికంపుదాం.
కాలం చేసిన గాయాలకు చల్లని ప్రేమతో సాంత్వనచేద్దాం!
గతజీవన వైభవాన్ని ప్రస్తుతంలోకి తిరిగి తీసుకువద్దాం.
ఒకరికొకరు తోడై కలకాలం కలిసివుందాం.
ఆనందాల బృందావనంలో కలిసి విహరిద్దాం.

-శివ భరద్వాజ్