బాలరామునికి అక్షర సుమాంజలి

రేలా రేలా రాముడో, రాములల్లా రాముడో
జరా జరా సూడరో, ముద్దు బాల రాముడో
కళ్లారా సూడరో, కౌసల్య పుత్రుడో,
మళ్ళా మళ్ళా సూడరో, ముద్దు బాల రాముడో  "రేలా రేలా"
దశరధుని బిడ్డడో, ముద్దు బాల రాముడో
రఘువంశ తిలకుడో, రాజ రాజు రాముడో  "రేలా రేలా"
కారుణ్య మూర్తిరో, కరుణా స్వరూపుడో,
కమలాన నిలిచిన, కందర్ప రూపుడో "రేలా రేలా"
చూడు చూడు పిల్లడో,  రాములల్లా రాముడో
చందమామ రూపురో, ముద్దు బాల రాముడో "రేలా రేలా"
సంపంగి పూవురో, అందాల రాముడో,
రాజీవ నేత్రుడో, రతనాల రాముడో "రేలా రేలా"
భలే భలే రాముడో, బాలక్ రాముడో
బాధలన్నీ తీర్చగ, బయలెల్లినాడు సూడరో "రేలా రేలా"

-శివ భరద్వాజ్

మత్తు అదో గమ్మత్తు

 మత్తు అదో గమ్మత్తు,
నాయకుల పరమ పద సోపానానికి అదే తొలి నిచ్చెనైనట్టు,
అది లేకపోతె ప్రభుత్వం నడవడానికి ఇంధనమే లేనట్టు,
గాంధీకి గౌరవమిచ్చి ఆగిన ఆయన పుట్టిన రాష్ట్రంలో కూడా
తిరిగి మొదలైనట్టి ఘన చరిత్ర దాని సొంతం.

పంచ మహాపాతకాలలో ఒకటైనా,
అదేమి చేయనట్టు,
దానివలన పోయే ప్రాణాలు ఎన్నివున్నా,
అదేమి ముద్దాయి కానట్టు,
దానిని ముట్టుకోక పోతే మహా పాపమన్నట్టు,
ముట్టుకోనట్టి వాడు మహా పాపి అన్నట్టు,
ఉంటుంది మన వ్యవహారం.

సినిమాలకు అదే మూలాధారమైనట్టు,
అదేమి పెద్ద వ్యసనం కానట్టు
అదో పెద్ద ఫ్యాషన్ అయినట్టు,
నాగరిక సమాజానికి అదే తార్కాణమన్నట్టు
ఉంటుంది మన వ్యవహారం.

బాధలోనూ దాని అవసరం ఉంది,
సంతోషంలోను దాని అవసరముంది,
ప్రేమ సఫలమైనా దానితో పార్టి,
ప్రేమ విఫలమైనా దానితో దోస్తీ,
మత్తు నిజంగానే అదో గమ్మత్తు.
దాని చేతిలో అందరూ చిత్తు చిత్తు.