సమస్తం మనలోనే ఉంది

 అనంత ఆకాశంలో
నక్షత్రాల మాటున
అగాధ సాగరంలో
పగడపు దీవుల చాటున
అద్భుత హిమ శిఖరాల
చల్లని హిమానీ నదాలలో  
కాకులు దూరని కారడవుల్లో
చీమలు దూరని చిట్టడవుల్లో
నిశ్శబ్ధపు నిశీధిలో
అబ్ధపు ఆవలి అంచులలో
అలుపెరుగని పయనం చేశాను
అవనీమండలమంతా తిరిగాను
సెలయేటి సవ్వడిలో నాగేటి సాలల్లో
పిల్ల కాలువల్లో మహానదుల్లో
సాగరాల్లో మహా సంద్రాల్లో
ఎడారుల్లో మైదానాల్లో
కొండల్లో కోనల్లో
ప్రతి పగలు ప్రతి రేయి
పున్నమి వెన్నెల్లో  అమాస చీకట్లో
ఎందని వెదకను ఎక్కడని వెదకను
నిన్ను వెతకని క్షణం లేదు
నిన్ను తలవని నిముషం లేదు
చివరకు తెలిసింది నీవెక్కడో లేవని
నా శ్వాసలో నా  రక్తంలో
నా తలపుల్లో నా తనువులో
నా మనసంతా నీవేవని
నీవే నాలో ఉన్నావని

మనశ్శాంతి విజయం సుఖం ఆనందము
సమస్తం మనలోనే ఉన్నాయి ఎక్కడో వెతకాల్సిన పని లేదు

--శివ భరద్వాజ్
భాగ్యనగరం