3, సెప్టెంబర్ 2023, ఆదివారం

తోడబుట్టిన అక్కను చంపె, పాడు మోహము

తోడబుట్టిన అక్కను చంపె,

పాడు మోహము, పాపము చేసె

తోడుగ ప్రియుండు ఉమరుడుండ.

చూడు నీ బతుకును


బాగుచేయతరమా! అందరు

వాగుచుందురు చులకన చేసి

వేగు చుందురు వేడినూనెన

కాగు మిడతల వలె


కామానికి, మోహానికి, ప్రేమకు

తేడా తెలియక క్షణికావేశంలో

ఎంతకైనా తెగించే

ఈ వైఖరికి కారణం ఎవ్వరు?

 

సాధించాలని సరదా పడితే చాలదు

సాధించాలని సరదా పడితే చాలదు
సాధించగలనన్న నమ్మకం సడల రాదు
సాధించాలన్న తపన వదల రాదు
సాధించాల్సిన లక్ష్యం నుండి దృష్టి మరల రాదు
సాధించాల్సిన లక్ష్యం వైపు పయనం ఆపరాదు

25, ఆగస్టు 2023, శుక్రవారం

మాటలు చెప్పుటేగాని మరి నిజముగ చేయ రాదు

 మాటలు చెప్పుటేగాని మరి నిజముగ చేయ రాదు
అడిగిన  తరుణమున మురియ,  ఆదుకొనగ చేత గాదు
సాయము చేయు వారి మనసా! నువు వెన్నవా?   కాదు
మాయెడల దయ  చూపు  మా మహా  దేవుడవే కదూ!

తెలుసుకుంటావా ఓ మానవుడా !

 డబ్బు జబ్బు చేసిన మనిషికి గౌరవం మబ్బు చాటుకి వెళ్లిన తెలియటం లేదు తెలిసినా పట్టించుకోవడం లేదు
నిబ్బు మందుతో జోగుతూ, కులం కైపుతో తూలుతున్నా సిగ్గు పడటం లేదు పడినా పట్టించుకోవడం లేదు.
జవసత్వాలు ఉడిగినా మానవత్వపు జాడ మరుగవుతున్నా మతం చిచ్చు ఆరడం లేదు  ఆరినా రాజేయడం ఆపడం లేదు.
యవ్వన మోహంలో కన్నవారిని, తమ కన్నవారిని, కట్టుకున్న వారిని కడతేర్చగ వెనకాడడం లేదు ఆడినా మోహపు మత్తు ఆగనివ్వడం లేదు.

తాము బ్రతుకుతున్నది అద్దాల మేడలో అని రాయి తాము విసిరినా
తమపై ఎదుటి వారు విసిరినా నిలువ నీడ లేనిది తమకేనని ఏనాటికైనా
తెలుసుకుంటావా ఓ మానవుడా ! విధి ఆటకు నువ్వు రాజువైన
బంటువైన చేరేది ఒకే విడిదికని తెలుసుకుంటావా ఓ మానవుడా !

3, మే 2023, బుధవారం

కాలం కరుణ లేనిది

కాలం కరుణ లేనిది


కాలం కరుణ లేనిది
క్షణకాలం నీ కోసం నాకోసం అగనంటుంది
తీపి జ్ఞాపకాలున్నా
చేదు నిజాలున్నా
ఏది ఏమైనా
సంతోష శుభోదయమైనా
విషాదసంధ్యా సమయమైనా
ఏ పరిస్థితెదురైనా
కాలం ఆగక ముందుకెళుతూనే ఉంటుంది

ఒక బంధాన్ని నిర్దయగా తుంచేస్తుంది
ఒక బంధాన్ని కొత్తగా చిగురింపచేస్తుంది
నువ్వు పొగిడినా పొంగిపోదు
నువ్వు తిట్టినా కుంగిపోదు
ఎన్నడూ తన పయనం మాత్రం ఆపబోదు
ఎప్పుడు తన గమనం మాత్రం ఆగిపోదు

కాలం కరుణ లేనిది
నువ్వు గెలిచావని ఆకాశాన్ని తాకినా
నువ్వు ఓడావని నేలపైన పడినా
తాను ముందుకెళుతూనే ఉంటుంది
కాలం కరుణ లేనిదని ఆడిపోసుకోకు
అన్నిటిని అర్ధం చేసుకో
ఆగిపోక ముందుకు సాగిపో
జీవితాన్ని జీవించడం నేర్చుకో  
కాల తత్వాన్ని అర్ధం చేసుకో
 

- శివ భరద్వాజ్
లైఫ్ కోచ్, వెల్త్ అడ్వైజర్ & కన్సల్టెంట్

7, మార్చి 2023, మంగళవారం

తాయత్తుకు నిజంగా మహిమ ఉందా? మనం కోరుకున్నది నెరవేరుస్తుందా?

తాయత్తుకు నిజంగా మహిమ ఉందా? మనం కోరుకున్నది నెరవేరుస్తుందా?

 

9 నెలలు నీ తల్లి మోస్తే నీవు పుట్టావు.

9 సంవత్సరాలు నీ లక్ష్యాన్ని మోస్తే నీ భవిష్యత్తు పుడుతుంది.

 

మరి నీ భవిష్యత్తు విజయవంతంగా ఉండాలంటే, విజయాన్ని నువ్వు సాధించాలంటే నీకొక విజన్ ఉండాలి. నీకొక స్పష్టమైన లక్ష్యం ఉండాలి. నీ లక్ష్యం చేరుకోవాలంటే నీవు ఒక తాయత్తు కట్టుకోవాలి. 


తాయత్తు కట్టుకుంటే దుష్ట శక్తులు దగ్గరకు రావని, అద్భుత శక్తులు వస్తాయని, ఏ విధమైన అనారోగ్యాలు రాకుండా 

కాపాడుతుందని, కష్టాలు రాకుండా చేస్తుందని,భయాన్ని పోగొడుతుందని, మనం కోరుకున్నది జరిగేలా చేస్తుందని  రక రకాల నమ్మకాలూ, భావనలు ప్రజలలో ఉన్నాయి. ఇది బలంగా నమ్మినవారికి, మూఢంగా నమ్మేవారికి, చాలా సందర్భాలలో వారు పెట్టుకున్న నమ్మకాలు, భావనలు నిజం అయ్యాయి కూడా. నిజంగా తాయత్తుకు అంత మహత్యం ఉందా?. తాయత్తు అంత శక్తి వంతమైనదా? తెలుసుకునే ముందు అసలు తాయత్తు అంటే ఏమిటి? దాని పుట్టు పూర్వోత్తరములు ఏమిటి? ఒకసారి తెలుసుకొందాం


తమిళంలో తాయి అంటే తల్లి, అత్తు అంటే ఖండించబడింది అని అర్ధం. తాయత్తు అంటే తల్లి నుండి ఖండించబడిందని అర్ధం. బిడ్డ పుట్టగానే తల్లి, పిల్లవాడిని కలిపివుంచే బొడ్డు తాడును కత్తిరిస్తారు. పూర్వకాలంలో ఇలా కత్తిరించిన బొడ్డు తాడును రక్తాన్ని కొన్నిరకాల పసర్లతో కలిపి ఒక లోహపు గొట్టంలో పురుడు పోసిన మంత్రసాని ఉంచేది.  బారసాల తరువాత దానిని ఎప్పుడూ బిడ్డ దగ్గరే ఉండేలా బిడ్డ మొలకు కట్టిఉంచేవారు. 


ఆ బిడ్డ జీవితాంతం అది మొలకు ఉండేది. కాలక్రమంలో ఎప్పుడైనా అంతుపట్టని పెద్ద జబ్బు వస్తే ఆయుర్వేద వైద్యులు వైద్యం చేయడం కోసం మొలకు కట్టిన బొడ్డుతాడు ముక్కను పసర్లతో కలిపి మందు తయారు చేసి ఇచ్చేవారు.రోగం నయమయ్యేది.  కాలంతో పాటు ఆ వైద్య విధానం కనుమరుగై పోయింది. అయినా ఆచారం కొనసాగుతుంది. ఇప్పుడు అది తగ్గిపోయి మొలతాడు కట్టుకుంటున్నారు, కొందరు అది కూడా మానేశారు. అయితే ఈ తాయత్తు వాడకం తప్పనిసరి చేయడం కోసం, పిల్లలు తీసివేయకుండా ఉండడం కోసం  రక రకాల కథలు అల్లారు. ఆ కథలే మనం ముందు చెప్పుకున్న మహత్యాలు. మరి అవి కథలైతే నిజం ఏమిటి? ఎందుకు తాయత్తుని కట్టుకుంటే మన కోరిక నెరవేరుతుంది!


"యాద్భావం తద్భవతి" -  అద్భుతమైన వాక్యం. దీనర్ధం మనం ఏది అనుకుంటే అది అవుతుంది. 


మనం ఏది జరగాలని బలంగా కోరుకుంటే, మనం  ఏది జరగాలని బలంగా విశ్వసిస్తే అది జరిగేందుకు అనుగుణంగా మన ఆలోచనలు మొదలవుతాయి. మన మెదడు మనం ఆ దిశగా పనిచేసేలా ప్రోత్సహిస్తుంది. దానికి అనుగుణంగా మన చర్యలు లేదా పనులు ఉంటాయి. మన కోరిక నెరవేరేలా ప్రతీ రోజూ ఆ దిశగా పని చేయడం వలన, ఆ పనులు మన అలవాట్లుగా మారుతాయి. మన అలవాట్లు మనల్ని మనం అనుకున్న దిశగా నడిపిస్తాయి, మనం అనుకున్నది జరుగుతుంది. ఇదే తాయత్తు మహిమ.


 

తన మీద తనకు నమ్మకం లేని వ్యక్తి, మానసికంగా బలం లేని వ్యక్తి, తాయత్తుని నమ్మేవారు చెప్పే మాటలు విని తన కోరికలు నెరవేర్చే శక్తి తాయత్తులో ఉందని బలంగా విశ్వసిస్తాడు, నమ్ముతాడు. దాంతో ఆ మూఢనమ్మకం వల్ల మనం ముందు చెప్పుకున్న ఆలోచన చర్యల పరంపర మొదలై అతని కోరిక నెరవేరే దిశగా అతని పయనం సాగుతుంది. అతను ఏ ఉద్దేశ్యంతో అయితే తాయత్తు ధరించాడో ఆ ఉద్దేశ్యం నెరవేరుతుంది. 


దీనిగురించి ఒక కథ చెబుతాను. ఒక ఊరిలో శివ అనే వ్యక్తి ఉండేవాడు. అతను జీవితంలో చాలా కష్టాలు అనుభవిస్తున్నాడు. అతను ఒకటి అనుకుంటే మరొకటి జరిగేది.  వ్యాపారం చేద్దామనుకుంటే నష్టాలు వచ్చేవి. ఉద్యోగం చేద్దామనుకుంటే ఎవరూ ఇచ్చేవారు కాదు. ఊరంతా అతనిని దురదృష్టవంతుడు అనేవారు, అతను ఎందుకు పనికిరానివాడని హేళన చేసేవారు. ఈ కష్టాలకు, సాటి వారు అనే మాటలకు నొచ్చుకున్న అతను ఆత్మహత్య చేసుకోవాలనుకున్నాడు. అతను నివసించే ప్రదేశానికి దూరంగా ఎత్తైన కొండ పైకి చేరుకున్నాడు. ఆ కొండ పై నుంచి దూక బోతున్నాడు. ఇంతలో ఒక బైరాగి అక్కడికి వచ్చాడు. ఆ బైరాగి నువ్వు ఎందుకు చనిపోవాలని కుంటున్నావు నాయనా అని శివని అడిగాడు. తన పరిస్థితి అంతా వివరంగా ఆ బైరాగికి చెప్పాడు. అప్పుడు ఆ బైరాగి పక పకమని నవ్వి నువ్వు దురదృష్టవంతుడివి కావు. చాలా అదృష్టవంతుడివి అందుకే ఆ సంఘటనలన్నీ నీ జీవితంలో జరిగాయి. నువ్వు చనిపోవడానికి నిశ్చయించుకొని ఇక్కడికి వచ్చావు. నాకు కనిపించావు. లేకుంటే నువ్వు నాకు కనిపించేవాడివి కావు. నీ అదృష్టం వలన ఆ సంఘటనలన్నీ నీ జీవితంలో జరిగాయి. 

నేను ఎంతోకాలం నుండి హిమాలయాలలో తపస్సు చేసి సాధించిన తపోశక్తితో ఒక అద్భుతమైన తాయత్తు చేశాను. ఆ తాయత్తును ఇవ్వడానికి యోగ్యత ఉన్న వ్యక్తి కోసం చూస్తున్నాను. ఆ యోగ్యత ఉన్న వ్యక్తి ఇన్నాళ్లకు నాకు కనిపించాడు. ఆ వ్యక్తివి నువ్వే అని ఆ తాయత్తులో మంత్రాక్షరాలతో రాసిన పేపర్ పెట్టి ఇచ్చాడు.

కుమారా ఈ తాయత్తుని జాగ్రత్తగా కాపాడుకో. పొరపాటున కూడా దీనిని ఎప్పుడూ ఓపెన్ చేయకు. ఆ పేపర్ లో ఏముందో చదవకు. అలా నువ్వు చేస్తే ఈ తాయత్తు దాని మహిమను కోల్పోతుంది. దీనిని ధరించడం వలన నీ జీవితం నువ్వు కోరుకున్న విధంగా మారుతుంది. నువ్వు నీ జీవితంలో అనుకున్నవి అన్ని సాధించాక,ఇంక జీవితంలో సాధించడానికి ఏమి లేదు అనుకున్నప్పుడు, నీ చివరి రోజులలో దీనిని ఓపెన్ చేసి చదువు. అప్పుడు ఈ తాయత్తు మహత్తు నీకు తెలుస్తుందని చెప్పి వెళ్లి పోయాడు.


శివ ఆనందంతో పొంగి పోయాడు. తన కష్టాలన్నిటికి కారణం, తాను చనిపోవాలనుకోవడానికి వెనుక ఇంత కథ ఉందన్నమాట, నేను చాలా అదృష్టవంతుడిని. ఈ తాయత్తు పొందడానికి నా జీవితంలో ఇన్ని కష్టాలు మాటలు పడ్డానన్న మాట అని అనుకున్నాడు. తన గతాన్ని మరిచిపోయాడు. తాను సాధించబోయే విజయాల గురించి ఊహించటం మొదలుపెట్టాడు. తన ఊహల్ని నిజం చేసుకోవటానికి ప్రయత్నం మొదలు పెట్టాడు. ఒక్కక్కటిగా జీవితంలో తాను అనుకున్నది సాధించటం మొదలు పెట్టాడు. భయపడటం మాని ప్రయత్నించటం మొదలు పెట్టాడు. విజయాలను అలవాటుగా మార్చుకున్నాడు. మంచి ఉద్యోగం వచ్చింది. మంచి భార్య లభించింది. బంగారం లాంటి పిల్లలు పుట్టారు. తాను అనుకున్నట్టుగా ఒక స్టార్ట్అప్ మొదలు పెట్టాడు. అది సక్సెస్ అయ్యి ఒక సక్సెస్ ఫుల్ entrepreneur అయ్యాడు. ఎంతో మందికి ఉద్యోగాలు ఇచ్చాడు. లగ్జరియస్ కార్లు కొన్నాడు. విలాసవంతమైన బంగ్లాలోకి అతని నివాసం మారిపోయింది. దేశవిదేశాలు తిరిగాడు. మంచి స్కూళ్ళు కట్టించాడు. విద్యను ప్రోత్సహించాడు. అనాధలకు ఆశ్రయం కల్పించాడు. సమాజానికి తన వంతు సేవ చేసాడు. పిల్లలు పెద్ద వాళ్లయ్యి బిజినెస్ చూసుకోవడం మొదలు పెట్టారు. తన జీవితంలో సాధించాలనుకున్నవి అన్ని సాధించాడు. ఇప్పుడు ముసలివాడయ్యాడు. తన జీవితం ధన్యమైంది అనుకున్నాడు. ఇక మనఃశాంతిగా చనిపోవచ్చనుకున్నాడు.  అప్పుడు అతనికి బైరాగి అన్న మాటలు జ్ఞాపకం వచ్చాయి. తాయత్తు గుర్తుకు వచ్చింది అది అతని చేతికి అలాగే ఉంది. ఆతృతగా దానిని తెరిచి ఆ పేపర్ లో ఏముందో చదివాడు. చదివి నిర్ఘాంత పోయాడు. కాసేపటికి తేరుకున్నాడు. నిజంగానే ఇది అద్భుతమైన, ప్రతిఒక్కరు తెలుసుకోదగిన సత్యం అని సంతోషించాడు. అందులో రాసి ఉన్న మంత్రం మీరు తెలుసుకోవాలనుకుంటున్నారా? అందుకు మీరు సిద్ధంగా ఉన్నారా? అయితే జాగ్రత్తగా వినండి. ఇది చాలా శక్తివంతమైన మంత్రం. అందులో ఇలా రాసి ఉంది.


"కుమారా! ఈ తాయత్తులో ఏమి లేదు. అనంతమైన శక్తి నీలోనే ఉంది. నీ ఆలోచనల్లోనే ఉంది. నీ మనస్సే సర్వ శక్తివంతమైనది. నీవు గడిపిన విజయవంతమైన నీ జీవితమే అందుకు గొప్ప ఉదాహరణ." 


అవును ఇది బైరాగి చెప్పిన గొప్ప జ్ఞానం. అనంతమైన శక్తి నీలోనే ఉంది. వివేకానందుడు చెప్పింది ఇదే, వేదాలు, పురాణాలు ఘోషించేది ఇదే..


మన విజయానికి అవసరమైన తాయత్తు మన మనస్సులోనే ఉంది. దానిని బయటకు తీద్దాం 


మనం విజయానికి అవసరమైన మనో తాయత్తు కట్టుకుందాం.

మనం విజయాలను అలవాటుగా మార్చుకుందాం.


ధన్యవాదములు మిత్రులారా!


జై హింద్

జై భారత్

వందే మాతరం. 

 

Watch on Youtube https://youtu.be/nv7sKm-5cLA 

 

24, అక్టోబర్ 2022, సోమవారం

పడతుల చెర విడిపించ - మగువల నుద్దరించగ

 కరకు రాక్షస రూపుడైన
నరకు కన్న కొడుకైనా
మరణము నిచ్చె అమ్మైన
ధీర సత్యభామ, పడతుల చెర విడిపించ

నరకు మారు రూపులై అబలల
మానముతో నాటలాడు కొడుకుల
శిరము నుత్తరించవలె అమ్మైన
ధీర నేటి భామ, మగువల నుద్దరించగ

మిత్రులకు బంధువులకు
దీపావళి శుభాకాంక్షలు
--శివ భరద్వాజ్






27, సెప్టెంబర్ 2022, మంగళవారం

మంచిమాట - Quotation

ఈనాటి  మంచిమాట:

 

22 అక్టోబర్ 2022 

  

సరైన వైఖరితో

సరైన సాధనాలతో

సరైన సమయంలో

సరైన పద్ధతిలో

సరిగ్గా పనులను చేస్తే

విజయం మీతో దోస్తీ చేస్తుంది.

 

14 అక్టోబర్ 2022

దురాలోచన రాక్షసుని చేస్తుంది.
సదాలోచన మాధవుని చేస్తుంది.

 

13 అక్టోబర్ 2022

రంధ్రాన్వేషణ చేయకు
రసాస్వాదన మానకు

 

10 అక్టోబర్ 2022

తాను జీవించడానికి మూల్యం చెల్లించే ఏకైక జీవి మనిషి

 

 27 సెప్టెంబర్ 2022

చిరునవ్వు ద్వేషాన్ని సైతం జయిస్తుంది.

చిరునవ్వు కోపాన్ని సైతం కరిగిస్తుంది.


4, సెప్టెంబర్ 2022, ఆదివారం

పంచకోశ శుద్ధి - పంచ జ్ఞాన సిద్ధి

భారతీయ వేదాంత తత్వచింతన చెప్పిన ఆధునిక సైకాలజీ సంగతులు:

మనందరం ఆధునిక మనోతత్వశాస్త్రంలో (సైకాలజీ) లో  మనిషి తెలివితేటలు గురించి ప్రస్తావన వచ్చినప్పుడల్లా తరుచుగా IQ గురించి వింటుంటాం. IQ అనే పదాన్ని 1912లో జర్మన్ మనస్తత్వవేత్త విలియం స్టెర్న్ రూపొందించారు. ఒక మనిషి ఎదుగుదలకు IQ చాలావరకు కారణం అవుతుంది. మరోవైపు, పని మరియు వృత్తి వంటి జీవిత రంగాలలో మీ విజయాన్ని నిర్ణయించే విషయంలో EQ ముఖ్యమైనది అనే భావన 1990లలో పుట్టి, 1995లో డేనియల్ గోలెమాన్ పుస్తకం ఎమోషనల్ ఇంటెలిజెన్స్‌తో ప్రాచుర్యంలోకి వచ్చింది. దీని తర్వాత SQ కూడా మనిషి విజయానికి తోడ్పడుతుందని కనుగొన్నారు. ప్రస్తుతం వీటన్నిటికీ తోడుగా AQ కూడా విజయానికి దోహద పడుతుందని వివరిస్తున్నారు. 

సమగ్ర నాయకత్వ విధానానికి, జీవితంలో విజయానికి ఐదు Qలు అవసరం. అవి

1) Physical Quotient (PQ) భౌతిక
2) Intelligence Quotient (IQ) మేధస్సు
3) Emotional Quotient (EQ) ఉద్వేగం
4) Spiritual Quotient (SQ) ఆధ్యాత్మికం  

5) Adversity Quotient (AQ) ప్రతికూలత నెదుర్కొనటం

Physical Quotient: మనిషి విజయంలో వ్యక్తిగత ఆరోగ్యం మరియు ఫిట్‌నెస్ కు గల ప్రాధాన్యత వివరిస్తుంది. ఆరోగ్యం మరియు ఫిట్‌నెస్ లేని వ్యక్తి విజయం పొందే అవకాశాలు తక్కువ.

Intelligence Quotient: ఇది గ్రహణశక్తి స్థాయికి కొలమానం. సమస్యలు పూరించడం, తార్కికంగా ఆలోచించటం మరియు జ్ఞాపకశక్తికి ఇది కొలమానం.

Emotional Quotient: ఇది ఆత్మవిశ్వాసం, స్వయం నియంత్రణ, అనుకూలత మరియు చొరవచూపగలగటం గురించి తెలుపుతుంది. అదేవిధంగా సామాజిక సంబంధాల మెరుగుదల, ఇతరులపట్ల సానుభూతితో వ్యవహరించటం, సేవాధోరణి. స్ఫూర్తిదాయక నాయకత్వ పద్ధతులు; మార్పు నిర్వహణ; సంఘర్షణ పరిష్కార నైపుణ్యాలు; సమిష్టి కృషి మెళుకువలు గురించి ఇది తెలుపుతుంది.

Spiritual Quotient: ఇది పరిస్థితితో సంబంధం లేకుండా, అంతర్గత మరియు బాహ్య శాంతిని కొనసాగిస్తూ, జ్ఞానం మరియు కరుణతో ప్రవర్తించే సామర్థ్యం. అహంకారాన్ని నియంత్రించగల సామర్ధ్యం. మన ఉద్దేశ్యాలు, విలువలు వాటి పట్ల మన దృష్టి మరియు నమ్మకం కోల్పోకుండా ఉన్నతమైన శక్తినుండి మార్గదర్శకత్వం కోరడం.

Adversity Quotient: ఇది ప్రతికూల పరిస్థితులను చక్కగా నిర్వహించగల సామర్థ్యం మరియు మారుతున్న పరిస్థితులను అనుకులంగా మార్చుకోగల సామర్ధ్యం గురించి తెలుపుతుంది.


ఇప్పుడు భారతీయ ఆధ్యాత్మిక చింతనలో చెప్పబడ్డ పంచకోశాలు గురించి తెలుసుకొందాం. ఈ పంచకోశాలను శుద్ధి చేయడం ద్వారా మనల్ని మనం ఉద్ధరించుకుంటూనే మన జీవితం మరియు మన చుట్టూ ఉన్న ప్రపంచంలో సానుకూల మార్పులు తీసుకురావచ్చు. ఈ కోశాలు ఐదు రకాలు. అవి
 
1)అన్నమయ కోశము: ఇది భౌతిక కోశం. మనకు కనిపించే శరీరం. మనకు ఉన్న శారీరక రుగ్మతలు లేదా ఆందోళనలను ప్రతిబింబిస్తుంది. మన శరీరం వివిధ రకాల ఆహారాలకు ఎలా స్పందిస్తుందో కూడా మీరు శ్రద్ధ వహించవచ్చు.అయిదు జ్ఞానేంద్రియాలను కలిగి ఉంటుంది. 1.చూపు,2.వాసన, 3.స్పర్శ,4.రుచి,5.వినికిడి లతో ఉన్న శరీరం అన్న మాట. అలాగే ఆ శరీరంలో ఎముకలు,కండరాలు,అవయవాలు ఈ అన్నమయ కోశ పరిధిలోకే వస్తాయి.దీనిని శుద్ధి చేసుకొనుట ద్వారా మానవుడు శారీరక ఆరోగ్యాన్ని పొందుతాడు. దీనికి ఆహార నియమాలు, యోగాసనాలు ఉపయోగ పడతాయి. ఆయుర్వేద విజ్ఞానం ద్వారా శారీరక రుగ్మతలు తొలగించుకోవచ్చు. మన PQ మెరుగవుతుంది.
2)ప్రాణమయ కోశము: మనం పంచేంద్రియాల ద్వారా గ్రహించినది శరీరంలో ఉన్న పంచ ప్రాణాల ద్వారా మన మెదడుకు చేరవేయబడుతుంది. ఎవరిలో ఈ ప్రాణశక్తి అధికంగా ఉంటుందో వారు మెదడు ఎక్కువ సమర్ధవంతంగా పనిచేస్తుంది. వారి IQ ఎక్కువగా ఉంటుంది. యమ, నియమాలు , ప్రాణాయామం వల్ల ఇది చైతన్యవంతమవుతుంది.
3)మనోమయ కోశము: 'మన" అంటే మనస్సు.ఇది ఆలోచనలు మరియు భావనలు, మెదడు మరియు ఎమోషన్ ల సమ్మిళితం. ఇందులో చేతనా, ఉప చేతనా మరియు అచేతనా అవస్థలు ఉంటాయి. దీనినే కాన్సియస్, సబ్ కాన్సియెస్ మరియు అన్ కాన్స యెస్ అంటాము. మీ మనస్సులో ఏమి జరుగుతుందో అది మీ శరీరంలో కూడా జరుగుతుంది.బాహ్య ప్రపంచం నుండి అనుభవాలు మరియు అనుభూతులను మీ సహజమైన శరీరంలోకి తీసుకువస్తుంది. మీ భావలకు ఉద్వేగాలకు ఇది మూలం. దీనిని నియంత్రించడం ద్వారా మీ ఆత్మ విశ్వాసం పెరుగుతుంది, మిమ్మల్ని మీరు అదుపులో ఉంచుకోగలుగుతారు. ఏదైనా సాధించగలమనే నమ్మకం ఏర్పడుతుంది. అందరితోను మీ సంబంధములును మెరుగు పరుచుకుంటారు. అరిషడ్వర్గములు ఈ కోశ శుద్ధి ద్వారా అరికట్టబడతాయి. ఇది ధ్యానం వల్ల సాధ్య పడుతుంది. మీ EQ మెరుగవుతుంది
4)విజ్ఞానమయ కోశము: ఇది మీ అంతర్ దృష్టి మెరుగు పరుస్తుంది. ఇది లోతైన అవగాహనను పెంపొందిస్తుంది మరియు వాస్తవికతను చూడటం నేర్పిస్తుంది. మీరు మీ ఆలోచనలను అహంకారం నుండి వేరుచేయడం నేర్చుకున్నప్పుడు మీరు అంతర్గతంగా అభివృద్ధి చెందుతారు. మీ ప్రతి క్షణాన్ని సద్వినియోగం చేయడం తెలుసుకుంటారు. జీవితంలో జరిగే సంఘటనలకు సాక్షిభూతులుగా ఉంటారు. సమత్వ భావం అలవర్చుకోంటారు. గెలుపు ఓటములు యొక్క ఉద్వేగాలు మిమ్మల్ని చేరవు. మీరు కేవలం మీ ప్రయత్నాన్ని 100% చేయడంపై దృష్టి పెడతారు. ఫలితం ఏదైనా మీరు సిద్ధంగా ఉంటారు. ఈ స్థితి మీరు ధ్యానంలో ఉచ్ఛ స్థితికి చేరినప్పుడు కలుగుతుంది. ప్రతికూల పరిస్థితులు, అనుకూల పరిస్థితులు అనే పరిమితులు ఉండవు. ఏ పరిస్థితి ఎదురైనా అది మీకు అనుకూలంగా మార్చుకోగలిగే జ్ఞానం మీకు కలుగుతుంది. SQ మరియు AQ ను విజ్ఞానంమయ కోశ శుద్ధి చేసుకొనుట ద్వారా వృద్ధి చేసుకోవచ్చు.
5)ఆనందమయకోశము: ఇది ఆత్మ పరమాత్మ, సుఖ దుఃఖములు, ప్రియాప్రియములు మొదలగు ద్వంద్వాలకతీతముగా ఉంటుంది. అందువల్ల మీరొక అద్భుత అలౌకిక ఆనంద స్థితిలో ఉంటారు. మీరు దేనినుండి వేరుకాదు అంతా మీరే అన్న స్పృహ కలుగుతుంది. ఇది  సమాధి స్థితిలో అనుభవం అవుతుంది. 

భారతీయ మహిళ ఔన్నత్యం

 నిజంగా లోతైన ఆలోచన కలిగించే వ్యాసం👇 🌼 మహిళల తెలివితేటలను అర్థం చేసుకోవడానికి ఎవరైనా ఎప్పుడైనా నిజంగా ప్రయత్నించారా? 🌼  మనం తరచుగా తెలివి...